ലിസ്ബണ്‍: യൂറോപ്പില്‍ ഇതുവരെ കണ്ടെത്തിയതില്‍വച്ചേറ്റവും വലിയ ദിനോസറിന്റെ അവശിഷ്ടങ്ങള്‍ കണ്ടെത്തി. പോര്‍ച്ചുഗലിലെ പോംബലില്‍ ഒരു വീട്ടുമുറ്റത്താണ് കൂറ്റന്‍ ദിനോസറിന്റെ അസ്ഥികൂടം കണ്ടെത്തിയത്. വീട്ടുമുറ്റത്ത് നിര്‍മ്മാണപ്രവര്‍ത്തനങ്ങള്‍ നടത്തുന്നതിനിടെയാണ് ദിനോസറിന്റെ അവശിഷ്ടങ്ങള്‍ ലഭിച്ചത്. 2017 മുതല്‍ പോംബലില്‍ ഗവേഷണം നടക്കുന്നുണ്ടെന്നാണ് അമേരിക്കന്‍ അസോസിയേഷന്‍ ഫോര്‍ ദ് അഡ്വാന്‍സ്‌മെന്റ് ഓഫ് സയന്‍സ് ബുധനാഴ്ച്ച പുറത്തിറക്കിയ വാര്‍ത്താക്കുറിപ്പില്‍ പറയുന്നത്. 39 അടി ഉയരവും 82 അടി നീളവുമുളള സോറോപോഡ് ദിനോസറിന്റെ അസ്ഥികളാണ് കണ്ടെത്തിയതെന്നാണ് പാലിയന്റോളജിസ്റ്റുകള്‍ പറയുന്നത്.
ഏകദേശം 160-100 ദശലക്ഷം വര്‍ഷങ്ങള്‍ക്കുമുന്‍പ് അപ്പര്‍ ജുറാസിക് മുതല്‍ ലോവര്‍ ക്രിറ്റേഷ്യസ് കാലഘട്ടം വരെ ജീവിച്ചിരുന്ന നീണ്ട കഴുത്തും വാലുമുളള ദിനോസറുകളാണ് സോറോപോഡുകള്‍. അവ ചെടികളായിരുന്നു ഭക്ഷിച്ചിരുന്നത്. സോറോപോഡുകള്‍ ഇന്നേവരെ ജീവിച്ചിരുന്നവയില്‍വെച്ച് കരയിലെ ഏറ്റവും വലിയ ജീവികളായിരുന്നു. കശേരുക്കളും വാരിയെല്ലുമുള്‍പ്പെടെയുളള ഭാഗങ്ങളാണ് ഇപ്പോള്‍ കണ്ടെത്തിയിരിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നിലവില്‍ കണ്ടെത്തിയ അസ്ഥികൂടത്തിന്റെ അവശിഷ്ടങ്ങള്‍ ലാബിലെത്തിച്ച് കൂടുതല്‍ പഠനങ്ങള്‍ നടത്തുമെന്നും അതിനുശേഷം മ്യൂസിയത്തില്‍ പ്രദര്‍ശിപ്പിക്കുമെന്നും ഗവേഷകര്‍ പറഞ്ഞു. പോംബലിലെ ദിനോസറിന്റെ അവശിഷ്ടങ്ങള്‍ ലഭിച്ച സ്ഥലത്തുനിന്നും സോറോപോഡുകളെക്കുറിച്ച് കൂടുതല്‍ തെളിവുകള്‍ ലഭിക്കാന്‍ സാധ്യതയുണ്ടെന്നും സ്ഥലത്ത് വിശദമായ ഖനനം നടത്തുമെന്നും അവര്‍ കൂട്ടിച്ചേര്‍ത്തു.
