കൊച്ചി: ഫേസ്ബുക്കില് പ്രധാനമന്ത്രി നരേന്ദ്രമോദിയെ അപമാനിക്കുന്ന തരത്തില് കമന്റ് ചെയ്തെന്നാരോപിച്ച് യുവനടന് നസ്ലിന് കെ ഗഫൂറിനെതിരെ സൈബര് ആക്രമണം. ബിജെപി-സംഘപരിവാര് അനുകൂലികളാണ് യുവനടനെതിരെ സൈബര് ആക്രമണം നടത്തുന്നത്. നസ്ലിന്റേതെന്ന പേരില് വ്യാജ അക്കൗണ്ടില്നിന്നാണ് കമന്റുകള് വന്നിരിക്കുന്നത്. പ്രധാനമന്ത്രിയുടെ ജന്മദിനത്തില് അദ്ദേഹം ചീറ്റപ്പുലികളെ തുറന്നുവിട്ട വാര്ത്തയ്ക്കുതാഴെ 'ഒരു ചീറ്റയെങ്കിലും പുറത്തേക്ക് ചാടിയാല് ഈ രാജ്യം രക്ഷപ്പെട്ടേനെ' എന്നായിരുന്നു വ്യാജ അക്കൗണ്ടില്നിന്നും വന്ന കമന്റ്. അതേ വ്യാജ അക്കൗണ്ടില്നിന്നും ബിജെപിക്കും സംഘപരിവാറിനുമെതിരെ നിരവധി കമന്റുകള് വന്നിട്ടുണ്ട്.
സംഭവത്തില് പ്രതികരണവുമായി നസ്ലിന് രംഗത്തെത്തി. 'സുഹൃത്തുക്കള് ഷെയര് ചെയ്ത് തന്നപ്പോഴാണ് എന്റെ പേരില് ആരോ ഒരാള് ഫേസ്ബുക്കില് ഫേക്ക് അക്കൗണ്ട് ഉണ്ടാക്കുകയും പ്രധാനമന്ത്രിക്കെതിരെ കമന്റ് ചെയ്യുകയും ചെയ്ത വിവരം അറിയുന്നത്. അതിന്റെ പേരില് എനിക്ക് പ്രശ്നങ്ങളുണ്ടായി. ഒരുപാട് പേര് വിശ്വസിച്ചിരിക്കുന്നത് അത് ചെയ്തത് ഞാനാണ് എന്നാണ്. എന്നാല് അതിന്റെ സത്യാവസ്ഥ അതല്ല. സൈബര് സെല്ലില് പരാതി നല്കിയിട്ടുണ്ട്. എനിക്ക് ഫേസ്ബുക്ക് പേജാണുളളത്. അത് ഞാനല്ല ഹാന്റില് ചെയ്യുന്നത്. ഫേസ്ബുക്ക് പേജും ആക്ടീവല്ല. എനിക്കെതിരെ ഇങ്ങനെ അപവാദം നടക്കുന്നുണ്ട് എന്നറിയുന്നതില് അതിയായ ദുഖമുണ്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
എന്റെ പേരുപയോഗിച്ച് എവിടെ നിന്നോ ഏതോ ഒരു വ്യക്തി ചെയ്യുന്ന കാര്യങ്ങള്ക്ക് ഞാന് പഴി കേള്ക്കേണ്ടിവരുന്നത് വേദന തരുന്ന കാര്യമാണ്. എന്റെ സിനിമ കാണുന്നത് നിര്ത്തി എന്നുവരെ മെസേജ് അയച്ചവരുണ്ട്. ഇത് ചെയ്തത് ആരായാലും എന്റെ ഭാഗത്തുനിന്ന് ചിന്തിച്ചുനോക്കൂ, നിങ്ങളുടെ പ്രവൃത്തി എന്നെ എത്ര വേദനിപ്പിക്കുമെന്ന്. ചില ഓണ്ലൈന് മാധ്യമങ്ങളും എനിക്കെതിരെ വാര്ത്തകള് കൊടുക്കുന്നുണ്ട്. വാര്ത്തകള് കൊടുക്കുമ്പോള് അതിന്റെ സത്യാവസ്ഥ മനസിലാക്കാന് ശ്രമിക്കണം'-എന്നാണ് നസ്ലിന് ഇന്സ്റ്റഗ്രാമില് പങ്കുവെച്ച വീഡിയോയില് പറയുന്നത്. തണ്ണീര് മത്തന് ദിനങ്ങള്, ജോ ആന്ഡ് ജോ, കേശു ഈ വീടിന്റെ നാഥന്, മകള്, ഹോം തുടങ്ങിയ ചിത്രങ്ങളിലെ അഭിനയത്തിലൂടെ പ്രേക്ഷകര്ക്ക് പ്രിയങ്കരനായ നടനാണ് നസ്ലിന്.
