തിരുവനന്തപുരം: സര്‍വീസില്‍ തിരികെ പ്രവേശിക്കാത്ത ഐ എ എസ് ഉദ്യോഗസ്ഥന്‍ രാജു നാരായണസ്വമിക്ക് സംസ്ഥാന സര്‍ക്കാര്‍ കാരണം കാണിക്കല്‍ നോട്ടീസ് നല്‍കി. ചീഫ് സെക്രട്ടറി ടോം ജോസ് ആണ് പ്രവേശിക്കാതിരിക്കുന്നതിന് കാരണം കാണിക്കണമെന്ന് ആവശ്യപ്പെട്ട് ചട്ടപ്രകാരം നോട്ടീസ് നല്‍കിയിരിക്കുന്നത്. ഇത് സര്‍വീസില്‍ നിന്ന് പിരിച്ചുവിടുന്നതിന്റെ ആദ്യപടിയാണെന്നും റിപ്പോര്‍ട്ടുണ്ട്.
2007- ല്‍ നാളികേര വികസന കോര്‍പ്പറേഷന്‍ എം.ഡി സ്ഥാനത്തു നീക്കം ചെയ്തതിനു ശേഷം രാജു നാരായണസ്വമി സംസ്ഥാന സര്‍വീസില്‍ തിരികെ പ്രവേശിക്കാന്‍ ഇതുവരെ തയാറായിട്ടില്ല. അനധികൃതമായി അവധിയിലിരിക്കുന്ന രാജു നാരായണസ്വമി സര്‍വീസില്‍ നിന്ന് പുറത്താക്കാന്‍ നേരത്തെ നടന്ന നീക്കത്തെ മുഖ്യമന്ത്രി ഇടപെട്ട് തടഞ്ഞിരുന്നു. എന്നാല്‍ അതിനുശേഷവും സര്‍വീസില്‍ തിരികെ പ്രവേശിക്കാന്‍ കൂട്ടാക്കാതിരുന്നതിനെ തുടര്‍ന്നാണ്‌ ചട്ടപ്രകാരമുള്ള ചീഫ് സെക്രട്ടറിയുടെ പുതിയ നടപടി.
