ശമ്പളത്തിന് പുറമെ പൊലീസുകാരുടെ അലവൻസുകളും സംസ്ഥാന സർക്കാർ വെട്ടിക്കുറച്ചു. ഡെ ഓഫ് അലവൻസ് റിസ്ക് അലവൻസ് തുടങ്ങിയവയാണ് തൽക്കാലത്തേക്ക് നിർത്തിവെച്ചത്. സർക്കാർ ജീവനക്കാരിൽ പൊലീസിൽ മാത്രമുള്ള പ്രത്യേക അലവൻസുകളാണിത്. പൊലീസുകാരുടെ ജോലിയുടെ സ്വഭാവം പരിഗണിച്ചാണ് ഇവ നൽകിയിരുന്നത് . ഇത്തരത്തിൽ എട്ട് അലവൻസുകളാണ് പൊലീസിൽ ഉള്ളത്. ഏഴ് ദിവസം തുടർച്ചയായി ജോലി ചെയ്താൽ നൽകുന്നതാണ് ഡേ ഓഫ് അലവൻസ്. യുണിഫോം അലവൻസ് , റേഷൻ അലവൻസ് തുടങ്ങിയവയും വെട്ടിക്കുറച്ചതിൽ ഉൾപ്പെടും.
ഇന്ന് ശമ്പളം കിട്ടിയപ്പോൾ മാത്രമാണ് അലവൻസുകൾ വെട്ടിക്കുറച്ച വിവരം പൊലീസുകാർ അറിയുന്നത്. സർക്കാർ നടപടിയിൽ പൊലീസ് സേനയിൽ വലിയ തോതിൽ അമർഷം ഉയർന്നിട്ടുണ്ട്. അതേസമയം എന്നാൽ പരസ്യമായി ആരും രംഗത്തു വന്നിട്ടില്ല. പൊലീസ് അസോസിയേഷൻ ഇതുവരെ ഇതിനെ കുറിച്ച് പ്രതികരിച്ചിട്ടില്ല. അഞ്ച് ദിവസത്തെ ശമ്പളം മാറ്റിവെച്ചതിന് പുറമെയാണ് അലവൻസുകൾ വെട്ടിക്കുറച്ചത്. പൊലീസിലെയും ആരോഗ്യ വകുപ്പിലെയും ജീവനക്കാരുടെ ശമ്പളം മാറ്റിവെക്കരുതെന്ന ആവശ്യം നിലനിൽക്കുമ്പോഴാണ് നിലവിലെ ആനുകൂല്യം കൂടി ഇല്ലാതാകുന്നത്.
