സ്വർണക്കടത്ത് കേസിൽ ഇടതു സർക്കാറിനെതിരെ വീണ്ടും ആഞ്ഞടിച്ച് പ്രതിപക്ഷം. സ്വർണക്കടത്ത് കേസിൽ പ്രതികളെ സംരക്ഷിക്കാൻ പൊലീസ് ബോധപൂർവ്വം ഒത്തുകളിക്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. ഗുരുതരമായ ഒരു കുറ്റകൃത്യം നടന്നുവെന്ന വിവരം പുറത്തുവന്നിട്ടും പോലീസ് കേസ് രജിസ്റ്റര് ചെയ്ത് അന്വേഷിക്കാന് തയ്യാറാകാതിരുന്നത് ചരിത്രത്തിലെ കറുത്ത അധ്യായമായി മാറുമെന്നും അദ്ദേഹം വാര്ത്താ സമ്മേളനത്തില് പറഞ്ഞു.
സ്വര്ണക്കടത്ത് കേസില് കേരള പോലീസ് എഫ്.ഐ.ആര്. രജിസ്റ്റര് ചെയ്ത് അന്വേഷണം നടത്തണമെന്ന് ആവശ്യപ്പെട്ട് ഡി.ജി.പിക്ക് ചെന്നിത്തല കത്തെഴുതിയിരുന്നു. വിവരങ്ങള് പുറത്തുവന്ന് ഒരാഴ്ച ആയിട്ടും പോലീസിന്റെ ഭാഗത്തുനിന്നും നടപടികളുണ്ടാകാത്തതിനെ തുടര്ന്നാണ് ഡിജിപിക്ക് കത്തയച്ചത്. ഒരാഴ്ചയായി സംസ്ഥാന പോലീസിന്റെ കണ്ണുവെട്ടിച്ച് ഒരു പ്രതി ഈ നാട്ടില് കറങ്ങി നടക്കുകയാണ്. എന്നിട്ട് ആഭ്യന്തര വകുപ്പിന്റെ ചുമതലയുള്ള മുഖ്യമന്ത്രി പറയുന്നത് ഇത് കസ്റ്റംസ് അന്വേഷിക്കണമെന്നാണ്. അവരുടെ പരിധിയിൽ പെടാത്ത അധികാര ദുർവിനിയോഗം, നിയമന അഴിമതി, ഉന്നതരുടെ പങ്ക് എന്നിവ സംബന്ധിച്ച് മറ്റ് ഏജൻസികൾ അന്വേഷിക്കണമെന്നും അദ്ദേഹം ആവശ്യപ്പെട്ടു
സംസ്ഥാന സര്ക്കാരിന്റെ സംവിധാനങ്ങള് ഈ കേസില് ദുരുപയോഗം ചെയ്തിട്ടുണ്ട്. സര്ക്കാരിന്റെ ഔദ്യോഗിക ചിഹ്നമുള്ള വിസിറ്റിങ് കാര്ഡ് അടിച്ച് താന് സര്ക്കാര് ഉദ്യോഗസ്ഥയാണെന്ന മട്ടില് സ്വപ്ന സുരേഷ് ആളുകളെ പരിചയപ്പെട്ടിട്ടുണ്ട്. ഇതുമാത്രമല്ല, സര്ക്കാരിന്റെ ഔദ്യോഗിക വാഹനങ്ങളില് വിമാനത്താവളത്തില്നിന്ന് സ്വര്ണം കടത്തിയെന്ന ആക്ഷേപവും നിലനില്ക്കുന്നുണ്ട്. ഇത്തരം ഗുരുതരമായ ആക്ഷേപങ്ങള് നിലനില്ക്കുന്ന കേസില് എന്.ഐ.എ. അന്വേഷണം വേറൊരു ദിശയിലാണ് നീങ്ങുന്നത്.
