കൊറോണ വൈറസ് ഇല്ലാതാക്കുന്നതിനായി ഹൈഡ്രോക്സിക്ലോറോക്വിൻ ഉപയോഗിക്കുന്നതിനെ വീണ്ടും പിന്തുണച്ച് യുഎസ് പ്രസിഡന്റ് ഡൊണാൾഡ് ട്രംപ്. സ്വന്തം പൊതുജനാരോഗ്യ ഉദ്യോഗസ്ഥരുടെ പ്രസ്താവനകൾക്ക് വിരുദ്ധമായാണ് ട്രംപ് നിലപാട് ആവര്ത്തിക്കുന്നത്.
മലേറിയ മരുന്ന് കോവിഡ് -19 ചികിത്സക്ക് ഉപയോഗിക്കരുതെന്ന് പറയുന്നത് അത് താൻ ശുപാർശ ചെയ്തതിനാൽ മാത്രമാണെന്ന് അദ്ദേഹം ആരോപിച്ചു. ട്രംപിന്റെ മൂത്ത മകന് ഹൈഡ്രോക്സിക്ലോറോക്വിൻ ഉപയോഗം പ്രോത്സാഹിപ്പിക്കുന്ന തരത്തിലുള്ള വീഡിയോ ട്വിറ്ററിലൂടെ ഷെയര് ചെയ്തിരുന്നു. ഉടന്തന്നെ ട്വിറ്റര് അത് മരവിപ്പിച്ചു.
ഹൈഡ്രോക്സിക്ലോറോക്വിൻ മരുന്നിന് വൈറസിനെതിരെ പോരാടാൻ കഴിയുമെന്നതിന് തെളിവുകളൊന്നുമില്ല. കൊറോണ വൈറസ് രോഗികളെ ചികിത്സിക്കുന്നതിനായി ഈ മരുന്ന് ഉപയോഗിക്കുന്നതിനെതിരെ കഴിഞ്ഞ മാസം യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷനും (എഫ്ഡിഎ) മുന്നറിയിപ്പ് നൽകിയിരുന്നു. ഹൈഡ്രോക്സിക്ലോറോക്വിൻ ഒരു ചികിത്സാരീതി എന്ന നിലയിൽ ഫലപ്രദമാണെന്നതിനോ കോവിഡ് -19 തടയുന്നുവെന്നതിനോ നിലവിൽ തെളിവുകളൊന്നുമില്ലെന്ന് ലോകാരോഗ്യ സംഘടനയും (ഡബ്ല്യുഎച്ച്ഒ) വ്യക്തമാക്കിയതാണ്.
