ഇന്ത്യയില് ഏറ്റവും കൂടുതല് കാലം ഭരിച്ച നാലാമത്തെ പ്രധാനമന്ത്രിയും, ആദ്യ കോണ്ഗ്രസ് ഇതര നേതാവുമായി നരേന്ദ്ര മോദി. ജവഹർലാൽ നെഹ്റു, ഇന്ദിരാഗാന്ധി, ഡോ.മൻമോഹൻസിങ് എന്നിവർക്ക് ശേഷമാണ് അദ്ദേഹം ഈ നേട്ടം കൈവരിച്ചത്. അടൽ ബിഹാരി വാജ്പേയിയുടെ റെക്കോർഡാണ് മോദി ഇന്നു മറികടക്കുക. 2272 ദിവസമാണ് വാജ്പേയി ഇന്ത്യ ഭരിച്ചത്.
2014 മെയ് 26 നാണ് നരേന്ദ്ര മോദി ആദ്യം പ്രധാനമന്ത്രിയായി ചുമതലയേറ്റത് . 2019 മെയ് 30 ന് രണ്ടാമതും ഇന്ത്യയുടെ പ്രധാനമന്ത്രിയായി അദ്ദേഹം ചുമതലയേറ്റു. ഇന്ദിര ഗാന്ധിയുടെ മൂന്നാം മന്ത്രിസഭ (1971- 77, 2198 ദിവസം) കഴിഞ്ഞാൽ ഇന്ത്യയിൽ ഏറ്റവും കൂടുതൽ കാലം അധികാരത്തിലിരുന്നതു നരേന്ദ്ര മോദിയുടെ ആദ്യ മന്ത്രിസഭയാണ് (2014- 19, 1830 ദിവസം).
ജവഹർലാൽ നെഹ്റു 17 വർഷവും , ഇന്ദിരാഗാന്ധി 11 വർഷവും , മന്മോഹൻ സിംഗ് 10 വർഷവുമാണ് പ്രധാനമന്ത്രിയായി അധികാരത്തിലിരുന്നത്. ഇടക്കാല പ്രധാനമന്ത്രി ഗുൽസാരിലാൽ നന്ദ ഉൾപ്പെടെ 15 പ്രധാനമന്ത്രിമാരുടെ നേതൃത്വത്തിൽ 29 മന്ത്രിസഭകളാണ് ഇന്ത്യയില് ഇതുവരെ അധികാരത്തിലിരുന്നത്.
