കൊവിഡ്-19 വാക്സിൻ വികസിപ്പിക്കാനും വിതരണം ചെയ്യാനുമുള്ള അന്താരാഷ്ട്ര സഹകരണ ശ്രമങ്ങളുമായി സഹകരിക്കില്ലെന്ന് ട്രംപ് ഭരണകൂടം. ലോകാരോഗ്യ സംഘടന (ഡബ്ല്യുഎച്ച്ഒ) പോലുള്ള ബഹുരാഷ്ട്ര സംഘടനകളുടെ നിയന്ത്രണങ്ങളിൽ താല്പര്യമില്ലാത്തതിനാലാണ് ഈ തീരുമാനമെന്ന് വൈറ്റ്ഹൌസ് അറിയിച്ചു.
ലോകാരോഗ്യ സംഘടനയിൽ നിന്ന് പുറത്തു പോകാനുള്ള തീരുമാനത്തിന് പിന്നാലെയാണ് ഭരണകൂടം ഇക്കാര്യം അറിയിച്ചത്. എന്നാല്, വൈറസിനെ പരാജയപ്പെടുത്തുന്നതിനായി തങ്ങൾ അന്താരാഷ്ട്ര സഖ്യ കക്ഷികളുമായി ചേര്ന്ന് പ്രവര്ത്തിക്കുന്നത് തുടരുമെന്നും, പക്ഷേ, അഴിമതി നിറഞ്ഞ, ചൈനീസ് സ്വാധീനത്തില് അകപ്പെട്ട ലോകാരോഗ്യ സംഘടന പോലെയുള്ള ബഹുരാഷ്ട്ര സംഘടനകളെ തങ്ങളെ നിയന്ത്രിക്കാൻ അനുവദിക്കില്ലെന്നും വൈറ്റ് ഹൗസ് വക്താവ് ജഡ് ഡിയർ പറഞ്ഞു.
യുഎസ് ആസ്ഥാനമായുള്ള ബയോടെക്നോളജി കമ്പനിയായ മോഡേണ വികസിപ്പിച്ച വാക്സിന് വിപണിയിൽ ലഭ്യമാകുന്നതിന് മുമ്പുള്ള അവസാന ഘട്ട പരീക്ഷണങ്ങളിലാണ്.
