മന്ത്രി കെടി ജലീലിനെ ദേശീയ അന്വേഷണ ഏജൻസി ചോദ്യം ചെയ്യുന്നു. കൊച്ചിയിലെ എൻഐഎ ആസ്ഥാനത്താണ് ചോദ്യം ചെയ്യൽ. രാവിലെ 6 നാണ് ചോദ്യം ചെയ്യൽ ആരംഭിച്ചത്. സ്റ്റേറ്റ് കാർ ഉപേക്ഷിച്ച് സ്വകാര്യ വാഹനത്തിലാണ് മന്ത്രി എൻഐഎ ഓഫീസിൽ എത്തിയത്. തിരുവനന്തപുരം സ്വർണ കള്ളക്കടത്ത് കേസുമായി ബന്ധപ്പെട്ടാണ് ചോദ്യം ചെയ്യൽ. കേസിലെ പ്രതികളുമായുള്ള ബന്ധവും, ഖുറാൻ വിതരണത്തിന് നൽകിയതുമായ വിഷയങ്ങൾ സംബന്ധിച്ചാണ് ചോദ്യം ചെയ്യൽ. ചോദ്യം ചെയ്യാൻ വിളിപ്പിക്കുന്നതുമായി ബന്ധപ്പെട്ട് സൂചനകൾ ഉണ്ടായിരുന്നു. എന്നാൽ തീയതിയും സമയവും വ്യക്തമായിരുന്നില്ല. മന്ത്രിയെ ചോദ്യം ചെയ്യുന്ന പശ്ചാത്തലത്തിൽ കൊച്ചിയിൽ എൻഐഎ ഓഫീസിലും പരിസരത്തും കനത്ത സുരക്ഷയാണ് ഏർപ്പെടുത്തിയിരിക്കുന്നത്. ഓഫീസിലേക്ക് പോകുന്ന റോഡും ഇടവഴികളും പൊലീസ് ബാരിക്കേഡ് വെച്ച് അടച്ചു. ഓഫീസിലേക്ക് പ്രതിഷേധ മാർച്ച് ഉണ്ടാകുമെന്ന ഇന്റലിജന്റ്സ് റിപ്പോർട്ടിനെ തുടർന്നാണ് സുരക്ഷ ഏർപ്പെടുത്തിയത്.
നേരത്തെ മന്ത്രിയെ എൻഫോഴ്സമെന്റ് ഡയറക്ടറേറ്റ് ചോദ്യം ചെയ്തിരുന്നു. അനധികൃതമായി സ്വത്ത് സമ്പാദിച്ചെന്ന പരാതിയെ തുടർന്നാണ് കഴിഞ്ഞയാഴ്ച ചോദ്യം ചെയ്തത്. 3 മണിക്കൂർ നേരമാണ് ചോദ്യം ചെയ്തത്. ചോദ്യം ചെയ്യലിൽ ഇഡി ലഭിച്ച വിവരങ്ങൾ കഴിഞ്ഞ ദിവസം എൻഐഎ ശേഖരിച്ചിരുന്നു.
