ഇന്ത്യയുടെ ആദ്യ വനിതാ പ്രധാനമന്ത്രി ഇന്ദിര ഗാന്ധിയുടെ 36ആം രക്തസാക്ഷി ദിനത്തിൽ നന്ദി പറഞ്ഞ് രാഹുൽ ഗാന്ധി. 'അസതോ മാ സത് ഗമയ' എന്ന് തുടങ്ങുന്ന വചനങ്ങൾ ഉദ്ധരിച്ചുകൊണ്ടാണ് രാഹുൽ തന്റെ മുത്തശ്ശിക്ക് നന്ദി അറിയിച്ചത്.
അസതോ മാ സത് ഗമയ എന്ന സംസ്‌കൃത വചനവും അതിന്റെ പരിഭാഷയും ഉൾപ്പെടുത്തിയാണ് രാഹുൽ ട്വീറ്റ് ചെയ്തത്. 'കളവിൽ നിന്നും സത്യത്തിലേക്ക്, ഇരുട്ടിൽ നിന്നും വെളിച്ചത്തിലേക്ക്, മരണത്തിൽ നിന്നും ജീവിതത്തിലേക്ക്. ഇത്തരത്തിൽ ജീവിക്കാൻ തന്നെ പഠിപ്പിച്ചതിന് ഒരുപാട് നന്ദി' അദ്ദേഹം കുറിച്ചു. ഇന്ദിര ഗാന്ധിയുടെ മനോഹരമായ ചിത്രത്തോടൊപ്പമാണ് ട്വീറ്റ്.
1966 ജനുവരി 24നാണ് ഇന്ദിര ഗാന്ധി പ്രഥമ വനിതാ പ്രധാനമന്ത്രിയായി സത്യപ്രതിജ്ഞ ചെയ്തത്. സ്ത്രീകളുടെ വിദ്യാഭ്യാസം, വോട്ട് ചെയ്യാനുള്ള അവകാശം, വിവാഹമോചന നിയമം എന്നിവയ്ക്കുവേണ്ടി അവർ ശബ്ദമുയർത്തി. എന്നാല്‍, 1975ൽ തിരഞ്ഞെടുപ്പ് അസാധുവാക്കിയ അലഹബാദ് ഹൈക്കോടതിയുടെ വിധിക്ക് പിന്നാലെ ഇന്ദിര പുറപ്പെടുവിപ്പിച്ച അടിയന്തരാവസ്ഥയാണ് അവരുടെ ഭരണ ജീവിതത്തിൽ കരിനിഴൽ വീഴ്ത്തിയത്. അമൃത്സറിലെ സുവർണ ക്ഷേത്രത്തിൽ ഇന്ത്യൻ പട്ടാളത്തെ അയച്ചതിന്റെ വൈരാഗ്യത്തിൽ 1984 ഒക്ടോബർ 31ന് രാവിലെ തന്റെ വസതിയിൽ വച്ചാണ് അംഗരക്ഷകര്‍ ഇന്ദിരയെ വെടിവെച്ച് കൊലപ്പെടുത്തിയത്.
