വടക്കാഞ്ചേരി ലൈഫ് മിഷനിൽ കോഴയായി യൂണിടാക് എംഡി സന്തോഷ് ഈപ്പൻ നൽകിയ അഞ്ചാമത്തെ ഐ ഫോൺ ആർക്കാണ് കിട്ടയതെന്ന് അറിയാമെന്ന് പ്രതിപക്ഷ നേതാവ് രമേശ് ചെന്നിത്തല. എന്നാൽ ഈ വിവരം താൻ ഇപ്പോൾ വെളിപ്പെടുത്തില്ലെന്നും ചെന്നിത്തല പറഞ്ഞു. ഈ വിവരം പറഞ്ഞതിന്റെ പേരിൽ ഇഡി തന്നെ ചോദ്യം ചെയ്യുമോ എന്ന് തനിക്കറിയില്ലെെന്നും അദ്ദേഹം പറഞ്ഞു. സന്തോഷ് ഈപ്പൻ പറഞ്ഞ പോലെ തനിക്ക് എന്തായാലും ഐ ഫോൺ കിട്ടിയിട്ടില്ലെന്ന് എല്ലാവർക്കും അറിയാം. കോട്ടയത്ത് തിരുവഞ്ചൂർ രാധാകൃഷ്ണന്റെ 24 മണിക്കൂർ ഉപവാസ സമരം ഉദ്ഘാടനം ചെയ്യുകയായിരുന്നു ചെന്നിത്തല. വികസന വിരുദ്ധതക്കെതിരെയും, അഴിമതി കള്ളക്കടത്ത് മാഫിയക്കെതിരുമാണ് തിരുവഞ്ചൂരിന്റെ ഉപവാസം.
ഐഫോൺ തനിക്ക് സമ്മാനമായി തന്നെന്ന ആരോപണത്തിൽ മാനനഷ്ടക്കേസുമായി മുമ്പോട്ട് പോകുമെന്നും ചെന്നിത്തല പറഞ്ഞു. ഈ വിഷയത്തിൽ താൻ നൽകിയ പരാതിയിൽ ഡിജിപി ഒരു നടപടിയും എടുത്തിട്ടില്ലെന്നും അദ്ദേഹം പറഞ്ഞു.
ഇഎംസും കൃഷ്ണപിള്ളയും ഇരുന്ന കേസേരയിലാണ് മയക്കുമരുന്ന് സംഘത്തിന് നേതൃത്വം കൊടുത്ത വ്യക്തി ഇരിക്കുന്നത്. ലഹരി മരുന്ന് കേസിൽ ഉൾപ്പെട്ടിട്ടും ബിനീഷിനെതിരെ എഫ്ഐആർ ഇട്ട് അന്വേഷണം നടത്തുന്നില്ല. ജനങ്ങൾ തെരെഞ്ഞെടുത്ത സർക്കാർ കള്ളക്കടത്തുകാരുടെയും ആധോലോകത്തിന്റെയും മനുഷ്യകടത്തുകാരുടെയും ഏജന്റുമാരായി മാറുകയാണെന്നും ചെന്നിത്തല ആരോപിച്ചു.