ലോകാരോഗ്യ സംഘടന തലവൻ ടെഡ്രോസ് അഥനോം ഗെബ്രിയേസസ് ക്വാറന്റൈനിൽ പ്രവേശിച്ചു. ഈയിടെ കൊവിഡ് സ്ഥിരീകരിച്ച വ്യക്തിയുമായി ടെഡ്രോസ് സമ്പർക്കത്തിലായിരുന്നു എന്ന റിപ്പോർട്ടിനെ തുടർന്നാണ് അദ്ദേഹം ക്വാറന്റൈനിൽ പ്രവേശിച്ചത്.
കൊവിഡ് പോസിറ്റീവ് ആയ വ്യക്തിയുമായി തനിക്ക് സമ്പർക്കമുണ്ടെന്ന് റിപ്പോർട്ട് വന്നതായും ഇതിനെത്തുടർന്ന് വരും ദിവസങ്ങളിൽ താൻ ക്വാറന്റൈനിൽ ആയിരിക്കുമെന്നും ടെഡ്രോസ് അറിയിച്ചു. ട്വിറ്റർ വഴിയാണ് അദ്ദേഹം ഇക്കാര്യം അറിയിച്ചത്. ഇതുവരെ കൊവിഡ് ലക്ഷണങ്ങളൊന്നും ഇല്ലെന്നും താൻ പൂർണ്ണ ആരോഗ്യവാനാണെന്നും ടെഡ്രോസ് ട്വീറ്റ് ചെയ്തു.
ലോകാരോഗ്യ സംഘടനയുടെ എല്ലാ മാനദണ്ഡങ്ങളും പാലിച്ചുകൊണ്ട് വീട്ടിലിരുന്ന് ജോലി ചെയ്യുമെന്നും അദ്ദേഹം പറഞ്ഞു. എല്ലാവരും കൊവിഡ് മാനദണ്ഡങ്ങൾ പാലിച്ചുകൊണ്ട് പകര്ച്ചവ്യാധിയെ മറികടക്കണമെന്നും ടെഡ്രോസ് കൂട്ടിച്ചേർത്തു. വൈറസിനെ അടിച്ചമർത്തി ആരോഗ്യ സംവിധാനങ്ങളെ സംരക്ഷിക്കേണ്ടതുണ്ടെന്നും അദ്ദേഹം പറഞ്ഞു.
