ലവ് ജിഹാദിനെതിരെ നിയമനിർമാണം നടത്തുമെന്ന് മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ. പ്രണയത്തിന്റെ പേര് പറഞ്ഞ് മതപരിവർത്തനം നടത്തുന്നതിനെ അംഗീകരിക്കില്ലെന്ന് ചൗഹാൻ പറഞ്ഞു. ലവ് ജിഹാദിനെതിരെ കർശന നിയമ നടപടികൾ സ്വീകരിക്കുമെന്ന് ചൗഹാൻ വ്യക്തമാക്കി. ബിജെപി ആസ്ഥാനത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഉത്തര്‍ പ്രദേശ്, ഹരിയാന സംസ്ഥാനങ്ങളും ലൗ ജിഹാദിനെതിരെ നിയമനിർമാണം നടത്തുമെന്ന് പ്രഖ്യാപിച്ചിരുന്നു. ലൗ ജിഹാദിനെതിരെ കേന്ദ്രസർക്കാർ നിയമനിർമാണം കൊണ്ടുവരുമെന്ന് ഹരിയാന മുഖ്യമന്ത്രി പറഞ്ഞിരുന്നു. ഫരീദാബാദില്‍ കോളജ് വിദ്യാര്‍ത്ഥിനിയെ വെടിവെച്ചുകൊന്ന സംഭവവുമായി ബന്ധപ്പെട്ട് കേന്ദ്ര സര്‍ക്കാരും നിയമനിര്‍മാണത്തെ പറ്റി ആലോചിക്കുന്നുണ്ടെന്നും ഖട്ടർ പറഞ്ഞു. നേരത്തെ ഹരിയാന ആഭ്യന്തര മന്ത്രിയായ അനില്‍ വിജ് ലൗ ജിഹാദിനെതിരെ നിയമനിര്‍മാണം നടത്തണമെന്നാവശ്യപ്പെട്ടിരുന്നു.
മതപരിവർത്തനത്തിന് ശ്രമിക്കുന്നവരെ 'രാം നാം സത്യ'യാത്രയ്ക്ക് അയക്കുമെന്നാണ് ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥ് മുന്നറിയിപ്പ് നൽകി.
