ഡിഎംകെ, എഐഎഡിഎംകെ പാർട്ടികളുമായി സഖ്യത്തിനില്ലെന്ന് മക്കൾ നീതി മയ്യം നേതാവും നടനുമായ കമലഹാസൻ. തമിഴ്നാട്ടിലെ പ്രാദേശിക പാർട്ടികളുമായുള്ള സഖ്യത്തിനാണ് ശ്രമിക്കുന്നതെന്ന് കമൽ വ്യക്തമാക്കി.
തമിഴ്നാട്ടിലെ മൂന്നാം മുന്നണിയാണ് കമലഹാസൻ നേതൃത്വം നൽകുന്ന മക്കൾ നീതി മയ്യം. അടുത്തവർഷം നടക്കാനിരിക്കുന്ന തമിഴ്നാട് തെരഞ്ഞെടുപ്പിന് മുന്നോടിയായി കോൺഗ്രസ്സും കമൽഹാസനെ യുപിഎ സഖ്യത്തിലേക്ക് ക്ഷണിച്ചിരുന്നു. എന്നാൽ ക്ഷണം കമലഹാസൻ നിരസിച്ചു.
ഇതിനോടൊപ്പം, സൂപ്പർസ്റ്റാർ രജനീകാന്തിന്റെ രാഷ്ട്രീയ പ്രവേശനവും വൻ ചർച്ചാവിഷയമാകുന്നുണ്ട്. കഴിഞ്ഞദിവസം ആർഎസ്എസ് നേതാവായ ഗുരുമൂർത്തിയുമായി അദ്ദേഹം ചർച്ച നടത്തിയിരുന്നു. ഇതിനെ തുടർന്ന് രജനീകാന്ത് ബി ജെ പിയിൽ അംഗമാകും എന്നുള്ള അഭ്യൂഹങ്ങൾ ശക്തമായിട്ടുണ്ട്. രജനികാന്ത് ബിജെപിയിലേക്ക് എത്തുന്നത് രാഷ്ട്രത്തിന് ഗുണം ചെയ്യുമെന്ന് ഗുരുമൂർത്തി നേരത്തെ പറഞ്ഞിരുന്നു.