രാജീവ് ഗാന്ധി കൊലപാതക കേസില്‍ ജീവര്യന്തം അനുഭവിക്കുന്ന പ്രതികളെ മോചിപ്പിക്കുന്നത് സംബന്ധിച്ച തീരുമാനമെടുക്കാന്‍ കോടതിയ്ക്കു മാത്രമേ കഴിയു എന്ന് തമിഴ്‌നാട് കോണ്‍ഗ്രസ് കമ്മിറ്റി നേതാവ് കെ എസ് അളഗിരി. കുറ്റവാളികളെ വിട്ടയച്ചാല്‍ സമാനമായ മറ്റു കുറ്റവാളികളെ മോചിപ്പിക്കാനുളള പ്രേരണയാവുമെന്നും അളഗിരി പ്രസ്ഥാവനയില്‍ പറഞ്ഞു.
ജീവപര്യന്തം തടവുകാരെ മോചിപ്പിക്കാന്‍ കോടതി തീരുമാനിച്ചാല്‍ ഞങ്ങള്‍ അത് സ്വീകരിക്കും എന്നാല്‍ രാഷ്ട്രീയ പാര്‍ട്ടികള്‍ അവരുടെ മോചനം ആവശ്യപ്പെടുന്നത് സ്വീകാര്യമല്ല. കൊലപാതകം ചെയ്തവരെ കൊലപാതകികളായി കാണണം അവരെ തമിഴരായി കരുതരുതെന്നും പ്രസ്ഥാവനയില്‍ പറയുന്നു. മുന്‍ പ്രധാനമന്ത്രിയെ കൊന്ന കൊലപാതകികളെ പിന്തുണയ്ക്കുന്നത് തമിഴ് സംസ്‌കാരമല്ല എന്നും അളഗിരി വ്യക്തമാക്കി.
കുറ്റവാളികള്‍ കഴിഞ്ഞ മൂന്ന് പതിറ്റാണ്ടുകളായി ജയില്‍ ശിക്ഷ അനുഭവിക്കുകയാണെന്ന് ഗവര്‍ണര്‍ക്ക് അയച്ച കത്തില്‍ ഡിഎംകെ നേതാവ് എംകെ സ്റ്റാലിന്‍ പറയുന്നു. ഇന്ത്യന്‍ ഭരണഘടനയുടെ 161ാം അനുച്ഛേദം പ്രകാരം ഏതെങ്കിലും കുറ്റകൃത്യത്തിനു ശിക്ഷിക്കപ്പെട്ട ഒരാളുട ശിക്ഷ നിര്‍ത്തലാക്കാനോ ഒഴിവാക്കാനോ ഉളള അധികാരം ഗവര്‍ണര്‍ക്കുണ്ട്. രണ്ടു വര്‍ഷത്തിലേറേയായി ഇതില്‍ തീരുമാനമുണ്ടായിട്ടില്ല. ഇത് പ്രതികള്‍ക്ക് ഗുരുതരവും പരിഹരിക്കാനാവാത്തതുമായ ബുദ്ധിമുട്ടുകള്‍ സൃഷ്ടിക്കുമെന്നും സ്റ്റാലിന്‍ കത്തില്‍ വ്യക്തമാക്കി. ഡിഎംകെ നേതാവിനൊപ്പം നിരവധി രാഷ്ട്രീയ പാര്‍ട്ടികളും മനുഷ്യാവകാശ സംഘടനകളും ജീവപര്യന്തം പ്രതികളെ നേരത്തെ മോചിപ്പിക്കണമെന്ന ആവശ്യം ഉന്നയിച്ചിരുന്നു.
