ഡല്‍ഹി: കേന്ദ്രസര്‍ക്കാര്‍ സെപ്റ്റംബറില്‍ പാസാക്കിയ മൂന്ന് കാര്‍ഷിക നിയമങ്ങളും റദ്ദാക്കണമെന്ന് ആവശ്യപ്പെട്ട് ഭാരതീയ കിസാന്‍ യൂണിയന്‍ സുപ്രീംകോടതിയില്‍ ഹര്‍ജി നല്‍കി. മൂന്ന് കാര്‍ഷിക നിയമങ്ങളും കര്‍ഷകരെ കോര്‍പ്പറേറ്റുകളുടെ അത്യാഗ്രഹത്തിന് ഇരകളാക്കുമെന്ന് ഭാരതീയ കിസാന്‍ യൂണിയന്‍ പ്രസിഡന്റ് ഭാനുപ്രസാദ് സിംഗ് സുപ്രീംകോടതിക്ക് സമര്‍പ്പിച്ച ഹര്‍ജിയില്‍ പറയുന്നു. മതിയായ ചര്‍ച്ചകളില്ലാതെയാണ് കേന്ദ്രസര്‍ക്കാര്‍ കാര്‍ഷിക നിയമങ്ങള്‍ പാസ്സാക്കിയതെന്നും ഹര്‍ജിയില്‍ ആരോപിക്കുന്നു.
ജൂണില്‍ ആദ്യ ഓര്‍ഡിനന്‍സ് പാസാക്കിയ കേന്ദ്രം സെപ്റ്റംബറിലാണ് കാര്‍ഷികനിയമങ്ങള്‍ പാര്‍ലമെന്റില്‍ പാസ്സാക്കിയത്. കാര്‍ഷിക നിയമങ്ങള്‍ക്കെതിരായി കഴിഞ്ഞ പതിനാറ് ദിവസങ്ങളായി തലസ്ഥാനത്ത് കര്‍ഷകര്‍ പ്രതിഷേധിക്കുകയാണ്. പഞ്ചാബ്, ഹരിയാന, ഉത്തര്‍പ്രദേശ് എന്നീ സംസ്ഥാനങ്ങളില്‍ നിന്നുളള കര്‍ഷകരാണ് ഡല്‍ഹിയില്‍ പ്രതിഷേധിക്കുന്നവരിലേറേയും. കാര്‍ഷികനിയമങ്ങള്‍ കര്‍ഷകനു നഷ്ടവും കോര്‍പ്പറേറ്റുകള്‍ക്ക് ലാഭവുമാണ് ഉണ്ടാക്കുന്നതെന്ന് കര്‍ഷകസംഘടനകള്‍ ആരോപിച്ചു.
പ്രക്ഷോഭം കടുപ്പിക്കാനൊരുങ്ങുകയാണ് കര്‍ഷകര്‍. രാജ്യവ്യാപകമായി ട്രെയിനുകള്‍ തടയുമെന്ന് സംയുക്ത സമരസമിതി പ്രഖ്യാപിച്ചു. ജിയോ, റിലയന്‍സ്, അദാനി കമ്പനികളുടെ ഉത്പന്നങ്ങള്‍ ബഹിഷ്‌കരിക്കുക, ജിയോ സിം ഉപയോഗിക്കുന്നവര്‍ പുതിയ കണക്ഷന്‍ എടുക്കുക തുടങ്ങി കടുത്ത നടപടികളാണ് കര്‍ഷക സംഘടനകള്‍ ആസൂത്രണം ചെയ്യുന്നത്. രാജ്യവ്യാപകമായി റാലികള്‍ നടത്തും. ഡല്‍ഹി, ജയ്പൂര്‍, ആഗ്ര ദേശീയപാതകള്‍ ഉപരോധിക്കും രാജ്യവ്യാപകമായി ദേശീയപാതകളിലെ ടോള്‍ പിരിവുകള്‍ തടയും തുടങ്ങി വന്‍ പ്രതിഷേധ പരിപാടികള്‍ നടത്താനാണ് കര്‍ഷകരുടെ തീരുമാനം.പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
