തിരുവനന്തപുരം: കേരള ചലച്ചിത്ര അക്കാദമിയിലെ നിയമനവുമായി ബന്ധപ്പെട്ട് ചെയര്മാന് കമല് സര്ക്കാരിനയച്ച കത്ത് വിവാദത്തില്. അക്കാദമിയില് നിലവില് താല്ക്കാലിക ജീവനക്കാരായി പ്രവര്ത്തിക്കുന്നവരെ സ്ഥിരപ്പെടുത്തണമെന്നാവശ്യപ്പെട്ടാണ് അക്കാദമി ചെയര്മാനായി പ്രവര്ത്തിക്കുന്ന സംവിധായകന് കമല് സാംസ്കാരിക മന്ത്രി ഏ കെ ബാലന് കത്തയച്ചിരിക്കുന്നത്. ഇടതുപക്ഷ അനുഭാവികളും ഇടത് സാംസ്കാരിക പ്രവര്ത്തനങ്ങളില് ഇടപെടുന്നവരുമായ പ്രസ്തുത ജീവനക്കാര് ഇടതു മൂല്യങ്ങള് ഉയര്ത്തിപ്പിടിക്കുന്നവരാണ് എന്ന് കത്തില് ചൂണ്ടിക്കാണിക്കുന്നു. ഇവരെ നിയമിക്കുന്നത് അക്കാദമിയുടെ ഇടത് സ്വഭാവം നിലനിര്ത്താന് സഹായിക്കുമെന്ന നിര്ദ്ദേശവും കമല് മന്ത്രി ബാലന് മുന്പാകെ വെയ്ക്കുന്നുണ്ട്. ഈ കത്താണ് ഇന്ന് പ്രതിപക്ഷ നേതാവ് നിയമസഭയുടെ മേശപ്പുറത്ത് വെച്ചതോടെ വിവാദമായിരിക്കുന്നത്.
എന്നാല് കത്തില് സൂചിപ്പിച്ച നിയമനം നടന്നിട്ടില്ല എന്ന് മറുപടി പറഞ്ഞുകൊണ്ട് മുഖ്യമന്ത്രി വിഷയത്തില് നിന്ന് ഒഴിയാന് ശ്രമിച്ചെങ്കിലും മന്ത്രി ഏ കെ ബാലന് കത്തില് കുറിച്ച പരാമര്ശം പ്രസ്തുത ജീവനക്കാരെ നിയമിക്കാനുള്ള അനുമതി തന്നെയാണ് എന്നാണു പ്രതിപക്ഷ വാദം. അക്കാദമി ചെയര്മാന് കമല് നല്കിയ കത്ത് ''പരിശോധിക്കുക" എന്ന നിര്ദ്ദേശത്തോടെയാണ് സാംസ്കാരിക സെക്രട്ടറിക്ക് കൈമാറിയത്.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
വര്ഷങ്ങളായി കരാര് നിയമനത്തില് പ്രവര്ത്തിക്കുന്ന ജീവനക്കാര്ക്ക് സ്ഥിരനിയമനം നല്കാനുള്ള സംസ്ഥാന സര്ക്കാരിന്റെ തീരുമാനം വിവാദമായതിനു തൊട്ടുപിന്നാലെയാണ് ഇപ്പോള് ചലച്ചിത്ര അക്കാദമിയിലെ താല്ക്കാലിക ജീവനക്കാരായ ഇടതു അനുഭാവികളെ നിയമിക്കാനുള്ള സര്ക്കാര് നീക്കം പുറത്തായിരിക്കുന്നത്.
