തെലങ്കാനയിലെ കുണ്ട്ലയിൽ കൊവിഡ് വാക്സിൻ സ്വീകരിച്ചയാൾ മരിച്ചതായി പരാതി. 42 വയസ്സുള്ള ആരോഗ്യ പ്രവർത്തകനാണ് മരിച്ചത്. കഴിഞ്ഞ ദിവസമാണ് ഇയാൾ കൊവിഡ് വാക്സിന്റെ ആദ്യ ഡോസ് സ്വീകരിച്ചത്. പ്രാഥമിക ആരോഗ്യ കേന്ദ്രത്തിൽ നിന്നാണ് വാക്സിൻ എടുത്തത്.
അടുത്ത ദിവസം ഉച്ചയോടെ ഇയാൾക്ക് നെഞ്ചുവേദന അനുഭവപ്പെട്ടു. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വൈകീട്ട് അഞ്ചരക്ക് മരണം സംഭവിച്ചതായി ആരോഗ്യ വകുപ്പ് പ്രസ്താവനയിൽ അറിയിച്ചു.
അതേസമയം മരണത്തിന് വാക്സിനേഷനുമായി ബന്ധമില്ലെന്നാണ് ആരോഗ്യ വകുപ്പിന്റെ വിശദീകരണം. സംഭവത്തെ കുറിച്ച് അന്വേഷിക്കാൻ ആരോഗ്യ വകുപ്പ് ഉത്തരവിട്ടിട്ടുണ്ട്. കുത്തിവെപ്പിന് ശേഷമുള്ള പാർശ്വഫലങ്ങൾ വിലയിരുത്തുന്ന കമ്മിറ്റി അന്വേഷിക്കുമെന്ന് സർക്കാർ അറിയിച്ചു.