ലോസ് ഏഞ്ചല്സ്: കൊവിഡ് ഭീതിമൂലം മൂന്നുമാസത്തോളമായി എയര്പോര്ട്ടില് ഒളിച്ചുതാമസിച്ചയാള് അമേരിക്കയില് അറസ്റ്റിലായി. ഇന്ത്യന് വംശജനായ മുപ്പത്തിയാറുകാരന് ആദിത്യ സിംഗാണ് അറസ്റ്റിലായത്. വൈറസിനെ പേടിച്ച് തിരികെ വീട്ടിലേക്ക് പോകാന് മടിച്ച യുവാവ് മൂന്നുമാസക്കാലം സകലരുടെയും കണ്ണുവെട്ടിച്ച് താമസിച്ചത് ചിക്കാഗോ ഇന്റര്നാഷണല് എയര്പോര്ട്ടിലായിരുന്നു.
ലോസ് ഏഞ്ചല്സില് താമസിക്കുന്ന ആദിത്യ ഒക്ടോബര് 19 മുതല് വിമാനത്താവളത്തില് സുരക്ഷിതസ്ഥാനം കണ്ടെത്തി താമസിക്കുകയായിരുന്നു. വിമാനത്താവളത്തില് അതിക്രമിച്ച് കയറല്, മോഷണം എന്നീ കുറ്റങ്ങളാണ് ഇയാള്ക്കെതിരെ ചുമത്തിയിരിക്കുന്നത്. തിരിച്ചറിയല് രേഖ കാണിക്കാന് യുണൈറ്റഡ് എയര്ലൈന്സ് ഉദ്യോഗസ്ഥര് ആവശ്യപ്പെട്ടതിനെത്തുടര്ന്ന് ആദിത്യ ഒരു ബാഡ്ജ് കാണിക്കുകയും അത് ഒരു ഓപ്പറേഷന് മാനേജറുടെ നഷ്ടപ്പെട്ട ബാഡ്ജാണെന്ന് സ്ഥിരീകരിക്കുകയും ചെയ്തതോടെയാണ് ആശ്ചര്യപ്പെടുത്തുന്ന ഈ വിവരം എയര്പ്പോര്ട്ട് അധികൃതര് അറിയുന്നത്.
ലോസ് ഏഞ്ചല്സില് സുഹൃത്തുക്കളോടൊപ്പം താമസിക്കുന്ന ഇയാള്ക്ക് ക്രിമിനല് പശ്ചാത്തലങ്ങളൊന്നുമില്ല, ഹോസ്പിറ്റാലിറ്റി മാനേജ്മെന്റില് ബിരുദധാരിയായ ആദിത്യ സിംഗ് തൊഴില്രഹിതനാണെന്നും പോലീസ് വ്യക്തമാക്കി.
