പുതുച്ചേരിയിൽ കോൺഗ്രസ് നേതാക്കൾ കൂട്ടത്തോടെ ബിജെപിയിലേക്ക്. 13 കോൺഗ്രസ് നേതാക്കളാണ് ബിജെപിയിൽ ചേക്കേറാൻ ഒരുങ്ങുന്നത്. ഇവരിൽ 5 പേർ സംസ്ഥാന ജനറൽ സെക്രട്ടറിമാരാണ്. ഇവർ പാർട്ടി പദവികൾ രാജിവെച്ചിട്ടുണ്ട്. ഇവരെ കോൺഗ്രസിൽ നിന്ന് സസ്പെൻഡ് ചെയ്തു.
സംസ്ഥാന ജനറല് സെക്രട്ടറിമാരായ കെ. എഗാംബരം, എ. വി. വീരരാഘവന്, വി. കൃഷ്ണബിരന്, സംസ്ഥാന സെക്രട്ടറിമാരായ എസ്. കെ. സാംബത്ത്, എസ്.സംരാജ് തുടങ്ങിയവരാണ് പാർട്ടിവിടുന്നത്. പൊതുമരാമത്ത് മന്ത്രിയും മുതിർന്ന കോൺഗ്രസ് നേതാവുമായ എം നമശിവായം രണ്ട് ദിവസം മുമ്പ് ബിജെപിയിൽ ചേർന്നിരുന്നു. മുഖ്യമന്ത്രി നാരായണ സ്വമിയുമായുള്ള അഭിപ്രായ വ്യത്യാസത്തെ തുടർന്നാണ് നമശിവായം കോൺഗ്രസിൽ നിന്ന് രാജിവെച്ചത്. പാർട്ടി വിരുദ്ധ പ്രവർത്തനത്തിന് നമശിവായത്തെ കോൺഗ്രസ് പുറത്താക്കി. നമശിവായത്തെ പിന്തുണക്കുന്നവരാണ് ബിജെപിയിലേക്ക് പോകാൻ ഒരുങ്ങുന്നത്.
നിയമസഭാ തെരഞ്ഞെടുപ്പ് ആസന്നമായിരിക്കെ കോൺഗ്രസ് നേതാക്കളുടെ കൂടുമാറ്റം കോൺഗ്രസ് നേതൃത്വത്തെ ആശങ്കയിലാക്കിയിട്ടുണ്ട്.
