ഇന്നലെ ഉദ്ഘാടനം ചെയ്ത ആലപ്പുഴ ബൈപ്പാസിലെ ടോൾ ബൂത്ത് ലോറി ഇടിച്ചു തകർത്തു. എറണാകുളം ഭാഗത്തു നിന്നും വരുമ്പോഴുള്ള കൊമ്മാടിയിലെ ടോൾ കൗണ്ടറാണ് പൂർണമായും തകര്ന്നത്. ഇന്നലെ രാത്രി തടി കയറ്റിവന്ന ലോറിയാണ് ബൂത്ത് തകർത്തത്. റോഡിൽ ടോൾ ബൂത്തുള്ള വിവരം അറിയാത്തതിനാലാണ് അപകടം സംഭവിച്ചത്. ലോറിക്കും സാരമായ കേടുപാടുകൾ പറ്റി. ലോറി അതിവേഗത്തിൽ വന്ന് ബൂത്ത് ഇടിച്ച് തെറിപ്പിക്കുകയായിരുന്നു. അപകട ശേഷം ലോറി നിർത്തിയില്ല. ലോറി കണ്ടെത്തുന്നതിനായി പൊലീസ് അന്വേഷണം ആരംഭിച്ചിട്ടുണ്ട്.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
ടോൾ പിരിവിനായി ദേശീയ പാത അതോറിറ്റിയാണ് ടോൾ ബൂത്ത് നിർമിച്ചത്. ടോൾ പിരിവ് ഇവിടെ ആരംഭിച്ചിരുന്നില്ല. അതിനാൽ തന്നെ ഈ സമയം ബൂത്തിൽ ആരും ഉണ്ടായിരുന്നില്ല. ഉദ്ഘാടനം കഴിഞ്ഞ മണിക്കൂറുകൾക്കുള്ളിൽ തന്നെ ബൈപ്പാസിൽ വാഹനാപകടം ഉണ്ടായി. വാഹനങ്ങൾ ഒന്നിന് പിറകെ ഒന്നായി കൂട്ടി ഇടിക്കുകയായിരുന്നു. രണ്ട് കാറുകളും ഒരു ലോറിയുമാണ് കൂട്ടിയിടിച്ചത്. വേഗതയിൽ പോവുകയായിരുന്ന കാർ ബ്രേക്കിട്ടതാണ് അപകടകാരണം.