ഡല്‍ഹി: നാളെ (ഫെബ്രുവരി -1) മുതല്‍ സിനിമാ തിയറ്ററുകളിലെ നൂറുശതമാനം ഇരിപ്പിടങ്ങളിലും കാണികളെ അനുവദിച്ചുകൊണ്ട് കേന്ദ്ര ആഭ്യന്തരമന്ത്രാലയം ഉത്തരവിറക്കി. കൊവിഡ് പടരാതിരിക്കാന്‍ തിയറ്ററുകള്‍ക്ക് മാര്‍ഗനിര്‍ദേശങ്ങളും പുറത്തിറക്കിയിട്ടുണ്ട്. തിയറ്ററിനു പുറത്ത് മതിയായ സാമൂഹിക അകലം പാലിക്കുകയും മാസ്‌ക്, ഹാന്‍ഡ് സാനിറ്റൈസറുകള്‍ എന്നിവ ഉപയോഗിക്കുകയും വേണം. തിയറ്ററിലും പൊതു ഇടങ്ങളിലും തുപ്പുന്നത് കര്‍ശനമായി നിരോധിച്ചിട്ടുണ്ട്. ആരോഗ്യസേതു ആപ്പ് ഉപയോഗിക്കാനും നിര്‍ദേശമുണ്ട്.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
കൊവിഡ് വൈറസ് ബാധയെത്തുടര്‍ന്ന് കഴിഞ്ഞ മാര്‍ച്ചിലാണ് രാജ്യത്തെ തിയറ്ററുകള്‍ അടച്ചുപൂട്ടിയത്. അതുമൂലം ചലച്ചിത്രരംഗത്തെ പ്രവര്‍ത്തകരും തിയറ്ററുടമകളും വിതരണക്കാരുമുള്‍പ്പെടെയുളളവര്‍ ദുരിതത്തിലായിരുന്നു. കഴിഞ്ഞ ഒക്ടോബറില്‍ 50 ശതമാനം കാണികളെ അനുവദിച്ച് കേന്ദ്രം ഉത്തരവിറക്കിയിരുന്നു. തിയറ്ററുകളില്‍ നൂറുശതമാനം കാണികളെ അനുവദിച്ചുകൊണ്ടുളള കേന്ദ്രത്തിന്റെ തീരുമാനത്തെ സ്വാഗതം ചെയ്യുന്നതായും, സിനിമാ മേഖലയെ വീണ്ടെടുക്കാനായി പ്രവര്‍ത്തിക്കുന്ന എല്ലാവര്‍ക്കും ആത്മാര്‍ത്ഥമായ നന്ദി അറിയിക്കുന്നതായും നിര്‍മാതാക്കളുടെ സംഘടന വ്യക്തമാക്കി.
