ശ്രീനഗര്: പതിനേഴ് മാസങ്ങള്ക്കുശേഷം 4ജി ഇന്റര്നെറ്റ് സേവനങ്ങള് പുനസ്ഥാപിച്ച് ജമ്മു കശ്മീര് ഭരണകൂടം. ആഭ്യന്തര വകുപ്പ് പ്രിന്സിപ്പല് സെക്രട്ടറി ഷലീന് കബ്ര പുറപ്പെടുവിച്ച വിജ്ഞാപനത്തിന്റെ അടിസ്ഥാനത്തിലാണ് കശ്മീരില് ഇന്റര്നെറ്റ് സേവനങ്ങള് പുനസ്ഥാപിക്കാന് തീരുമാനമായത്. ഓഗസ്റ്റില് ഗന്ദര്ബാല്, ഉദ്ധംപൂര് മേഖലകളില് 4ജി സേവനങ്ങള് പുനസ്ഥാപിച്ചിരുന്നെങ്കിലും കശ്മീരിന്റെ മറ്റു പ്രദേശങ്ങളില് ഇന്റര്നെറ്റ് സൗകര്യം ലഭ്യമായിരുന്നില്ല. സെപ്റ്റംബറില് സുപ്രീംകോടതി ഉത്തരവ് പ്രകാരം കശ്മീരില് ബ്രോഡ്ബാന്ഡ്, 2ജി ഇന്റര്നെറ്റ് സേവനങ്ങള് പുനസ്ഥാപിച്ചിരുന്നു.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
2019 ഓഗസ്റ്റില് ജമ്മു കശ്മീരിന് പ്രത്യേക പദവി നല്കുന്ന ആര്ട്ടിക്കിള് 370 ഭരണഘടനില് നിന്ന് പിന്വലിച്ച് സംസ്ഥാനത്തെ ലഡാക്ക്, ജമ്മു കശ്മീര് എന്നീ കേന്ദ്രഭരണ പ്രദേശങ്ങളാക്കിയതിനു പിന്നാലെയാണ് ജമ്മു കശ്മീരിലുടനീളം 4ജി ഇന്റര്നെറ്റ് സേവനങ്ങള് നിര്ത്തിവച്ചത്. സംസ്ഥാനത്തെ വിദ്യാര്ത്ഥികളും ബിസിനസുകാരുമുള്പ്പെടെയുളള ജനങ്ങള് ബുദ്ധിമുട്ടുകയാണ്, പ്രധാനമന്ത്രി 5ജി നെറ്റ്വര്ക്കിനെക്കുറിച്ച് സംസാരിക്കുമ്പോള് കശ്മീരികള്ക്ക് 4ജി പോലും ലഭ്യമല്ല, അതിനാല് ഇന്റര്നെറ്റ് സേവനങ്ങള് പുനസ്ഥാപിക്കണമെന്ന് ജമ്മു കശ്മീര് മുന് മുഖ്യമന്ത്രിയും നാഷണല് കോണ്ഫറന്സ് നേതാവുമായ ഫറൂഖ് അബ്ദുളള കേന്ദ്രത്തോട് ആവശ്യപ്പെട്ടിരുന്നു.