ചെന്നൈ: വിവാദമായ പൗരത്വഭേദഗതി നിയമത്തിനെതിരെയുളള പോരാട്ടം തുടരുമെന്ന് ഡിഎംകെ നേതാവ് എംകെ സ്റ്റാലിന്‍. പൗരത്വഭേദഗതി നിയമം റദ്ദാക്കാനും ഇന്ത്യയിലെ അഭായാര്‍ത്ഥി ക്യാമ്പുകളില്‍ താമസിക്കുന്ന ശ്രീലങ്കന്‍ തമിഴര്‍ക്ക് പൗരത്വം നല്‍കാനും കേന്ദ്രസര്‍ക്കാരിനോടാവശ്യപ്പെടുമെന്നും സ്റ്റാലിന്‍ പറഞ്ഞു. ഡിഎംകെ, സിഎഎ നിയമങ്ങള്‍ക്കെതിരാണ്, നിയമങ്ങള്‍ക്കെതിരായി നിരവധി പ്രതിഷേധ പരിപാടികള്‍ സംഘടിപ്പിച്ചിട്ടുണ്ടെന്നും പാര്‍ട്ടി പ്രകടനപത്രികയില്‍ പറയുന്നുണ്ട്.
ഡിഎംകെ അധികാരത്തിലെത്തിയാല്‍ പൗരത്വനിയമങ്ങള്‍ക്കെതിരെ ഒരു പ്രമേയം പാസാക്കുമെന്നും കേന്ദ്രസര്‍ക്കാരിന്റെ തെറ്റായ നടപടികള്‍ക്കെതിരെ എന്നും ശബ്ദമുയര്‍ത്തുമെന്നും എംകെ സ്റ്റാലിന്‍ പറഞ്ഞു. കര്‍ഷകവിരുദ്ധമായ ചെന്നൈ-സേലം എക്‌സ്പ്രസ് വേയും കട്ടുപ്പളളി തുറമുഖപദ്ധതിയും നടപ്പിലാക്കില്ലെന്നും ഡിഎംകെ പ്രകടനപത്രികയില്‍ പറയുന്നു. ഏപ്രില്‍ ആറിനാണ് തമിഴ്‌നാട് നിയമസഭാ തെരഞ്ഞെടുപ്പ് നടക്കുക. കഴിഞ്ഞ ദിവസം ഡിഎംകെ 170 മണ്ഡലങ്ങളിലെ സ്ഥാനാര്‍ത്ഥികളെയും പ്രഖ്യാപിച്ചിരുന്നു. കൊളത്തൂര്‍ മണ്ഡലത്തില്‍ നിന്നാണ് എംകെ സ്റ്റാലിന്‍ മത്സരിക്കുക.
