ഡല്ഹി: ബിജെപി സ്ഥാനാര്ഥി പട്ടിക ഡല്ഹിയില് പ്രഖ്യാപിച്ചു. 112 മണ്ഡലങ്ങളിലെ സ്ഥാനാര്ഥികളുടെ പട്ടികയാണ് വൈകീട്ടോടെ പുറത്തിറക്കിയത്. ആകെ 115 മണ്ഡലങ്ങളില് മത്സരിക്കുന്ന പാര്ട്ടിയുടെ മൂന്നു മണ്ഡലങ്ങളിലെ സ്ഥാനാര്ഥികളെ പിന്നീട് പ്രഖ്യാപിക്കും.
നിലവില് പുറത്തുവന്ന പട്ടിക പ്രകാരം സംസ്ഥാന പ്രസിഡന്റ് കെ.സുരേന്ദ്രന് രണ്ടു മണ്ഡലങ്ങളില് മത്സരിക്കും. കഴിഞ്ഞ തവണ നൂറില് താഴെ വോട്ടുകള്ക്ക് പരാജയപ്പെട്ട മഞ്ചേശ്വരത്തും കോന്നിയിലുമാണ് സുരേന്ദ്രന് മത്സരിക്കുക. അതേസമയം സംസ്ഥാന വൈസ് പ്രസിഡന്റ് ശോഭാ സുരേന്ദ്രന് സീറ്റ് നിഷേധിച്ചു. ശോഭാ സുരേന്ദ്രന് സീറ്റു നല്കിയാല് താന് രാജിവെക്കും എന്ന സുരേന്ദ്രന്റെ ഭീഷണിയാണ് ശോഭാ സുരേന്ദ്രന് സീറ്റ് നിഷേധിക്കപ്പെടാന് കാരണമായത് എന്നാണ് റിപ്പോര്ട്ട്.
കഴിഞ്ഞ തവണ ഒ രാജഗോപാല് വിജയിച്ച നേമം മണ്ഡലത്തില് മുന് സംസ്ഥാന അധ്യക്ഷന് കുമ്മനം രാജശേഖരന് മത്സരിക്കും. തൃശൂരില് സുരേഷ് ഗോപിയും പാലക്കാട് ഇ. ശ്രീധരനും വട്ടിയൂര്കാവില് വി. വി. രാജേഷും മത്സരിക്കും. നടന് കൃഷ്ണകുമാര് തിരുവനന്തപുരത്തും കോഴിക്കോട് സര്വ്വകലാശാലാ മുന് വൈസ് ചാന്സലര് അബ്ദുല് സലാം തിരൂരിലും മുന് ഡിജിപി ജേക്കബ് തോമസ് ഇരിങ്ങാലക്കുടയിലും മത്സരിക്കും.
