റായ്ദിഗി: തെരഞ്ഞെടുപ്പില് വിജയിക്കുന്നതിനും ബിജെപി വര്ഗീയത ആയുധമാക്കുന്നുവെന്ന് പശ്ചിമ ബംഗാള് മുഖ്യമന്ത്രി മമത ബാനര്ജി. റായ്ദിഗിയില് നടന്ന തെരഞ്ഞെടുപ്പ് റാലിയില് സംസാരിക്കുകയായിരുന്നു മമത. വോട്ടുകള് ധ്രുവീകരിക്കാനുളള ബിജെപിയുടെയും സഖ്യകക്ഷികളുടേയും കെണിയില് വീഴരുതെന്നും സംസ്ഥാനത്തെ മുസ്ലീം-ന്യൂനപക്ഷ ജനവിഭാഗങ്ങളോട് മമത ആവശ്യപ്പെട്ടു.
ഹിന്ദുക്കളും മുസ്ലീങ്ങളും ഒരുമിച്ചിരുന്ന് ചായ കുടിക്കുകയും ദുര്ഗ്ഗാപൂജ ആഘോഷിക്കുകയും ചെയ്യും. അതാണ് നമ്മുടെ സംസ്കാരം. ഇരു മത വിഭാഗങ്ങളും തമ്മില് എന്തെങ്കിലും പ്രശ്നങ്ങളുണ്ടായാല് അതിന്റെ ഗൂണം കിട്ടുക ബിജെപിക്കാണെന്നും മമത കൂട്ടിച്ചേര്ത്തു.
താന് വീട്ടില് നിന്നിറങ്ങുന്നതിനു മുന്പായി മന്ത്രം ചൊല്ലി പ്രാര്ത്ഥിക്കുന്ന ഹിന്ദുവാണ്. അതേസമയം എല്ലാ മതങ്ങളെയും ബഹുമാനിക്കുകയെന്ന പാരമ്പര്യത്തില് വിശ്വസിക്കുന്ന ആളുമാണ്. ബ്രാഹ്മണ സ്ത്രീയായ തന്റെ എല്ലാ കാര്യങ്ങളും നോക്കുന്ന സ്ത്രീ പട്ടിക ജാതി വിഭാഗത്തില് നിന്നുളളയാളാണ്. അത് തനിക്ക് പരസ്യമാക്കി നടക്കേണ്ട കാര്യമില്ല. ദളിതരുടെ വീടുകളില് നിന്ന് ഭക്ഷണം കഴിക്കുന്ന ഫോട്ടോകള് പ്രചരണത്തിനായി ഉപയോഗിക്കുന്നവര് ഫൈവ് സ്റ്റാര് ഹോട്ടലുകളില് നിന്ന് ഭക്ഷണം കൊണ്ടുവന്ന് ദളിതരുടെ വീടുകള്ക്ക് മുന്നിലിരുന്ന് കഴിക്കുന്നവരാണെന്നും മമത ആരോപിച്ചു.
