ആർത്തവ കപ്പുകളുടെ തെറ്റായ ഉപയോഗം ചില സ്ത്രീകളില് പെൽവിക് അവയവങ്ങളുടെ സ്ഥാനചലനത്തിന് കാരണമാകുമെന്ന് പഠനം. ബി.ബി.സി-യുടെ വിക്ടോറിയ ഡെർബിഷയർ പ്രോഗ്രാമാണ് ഇതുസംബന്ധിച്ച ഔദ്യോഗിക മുന്നറിയിപ്പ് നല്കിയിരിക്കുന്നത്. ആർത്തവ ദിനങ്ങളിലെ അസ്വസ്ഥതകൾക്ക് വലിയൊരളവിൽ ആശ്വാസം വാഗ്ദാനം ചെയ്യുന്നവയാണ് ആർത്തവ കപ്പ് അഥവാ മെൻസ്റ്ററൽ കപ്പ്. ഇന്ത്യയില് നിലവില് ആർത്തവ കപ്പുകള്ക്ക് ഏതെങ്കിലും തരത്തിലുള്ള നിയന്ത്രണങ്ങളോ സുരക്ഷാ പരിശോധനയോ ഇല്ല.
Also Read
ഇന്ത്യയില് ഇപ്പോഴും വലിയ രീതിയില് പ്രചാരം നേടാത്ത ഒരു സംവിധാനമാണ് മെൻസ്റ്ററൽ കപ്പ്. പരമ്പരാഗത രീതികളെക്കാൾ ശുചിത്വം ഉറപ്പുവരുത്തുന്ന ഇവ ആരോഗ്യത്തിന് ഹാനികരമല്ലെന്ന് ആരോഗ്യവിദഗ്ധരും സാക്ഷ്യപ്പെടുത്തുന്നു. ഒരുപയോഗം കൊണ്ട് ഉപേക്ഷിക്കാതെ 10 വർഷം വരെ വീണ്ടും പുനരുപയോഗിക്കാം എന്നതാണ് പ്രത്യേകത. എന്നാല് വേണ്ട രീതിയില് ഉപയോഗിച്ചില്ലെങ്കില് മറ്റു പല ആരോഗ്യ പ്രശ്നങ്ങളും ഉണ്ടാകുമെന്നാണ് ഇപ്പോള് കണ്ടെത്തിയിരിക്കുന്നത്. പെൽവിക് ഫ്ലോർ എന്നറിയപ്പെടുന്ന പെൽവിക് അവയവങ്ങളെ താങ്ങുന്ന പേശികളുടെയും ടിഷ്യൂകളുടെയും കൂട്ടം ദുർബലമാവുകയും അവയവങ്ങളെ മുറുകെ പിടിക്കാൻ കഴിയാതിരിക്കുകയും ചെയ്യുമ്പോഴാണ് അവയവങ്ങളുടെ സ്ഥാന ചലനം സംഭവിക്കുന്നതെന്ന് വിദഗ്ദ്ധര് സാക്ഷ്യപ്പെടുത്തുന്നു.
