മുൻ മന്ത്രി കെ. ബാബുവിനെ എൻഫോഴ്സ്മെന്റ് ഡയറക്ടേറ്റ് ചോദ്യം ചെയ്തു. വരവിൽ കവിഞ്ഞ സ്വത്ത് സമ്പാദനക്കേസിലാണ് എൻഫോഴ്സ്മെന്റ് കൊച്ചിയിലെ ഓഫീസിൽ വിളിച്ചുവരുത്തി ബാബുവിനെ ചോദ്യം ചെയ്തത്. നേരത്തെ ഇതേ വിഷയത്തിൽ വിജിലൻസ് കെ.ബാബുവിനെതിരെ കേസെടുത്തിരുന്നു. 2011 മുതൽ അഞ്ചു വർഷക്കാലം ഉമ്മൻ ചാണ്ടി മന്ത്രിസഭയിൽ അംഗമായിരുന്ന ബാബു അനധികൃതമായി വൻതോതിൽ സ്വത്തു സമ്പാദിച്ചുവെന്നതാണ് കേസ്.
2011-ൽ ബാബു ഇലക്ഷൻ കമ്മീഷനു മുന്നിൽ കാണിച്ച സമ്പത്ത് വെറും ഒന്നേ മുക്കാൽ ലക്ഷമായിരുന്നു. എന്നാൽ തൊട്ടടുത്ത വർഷം ഇത് 25 ലക്ഷമായി ഉയർന്നു. ഇതിന്റെ ഉറവിടം തേടിയുള്ള അന്വേഷണത്തിന്റെ ഭാഗമായാണ് എൻഫോഴ്സ്മെന്റ് ചോദ്യം ചെയ്തത്. ഇതിനിടെ തനിക്കെതിരായ നടപടികൾ നിർത്തിവെക്കാൻ ആവശ്യപ്പെട്ട് കെ.ബാബു ഹൈകോടതിയെ സമീപിച്ചിട്ടുണ്ട്.