വത്തിക്കാന്: വത്തിക്കാന് ചിത്രം കോപ്പിയടിച്ചെന്ന പരാതിയുമായി കലാകാരി. റോം സ്വദേശിനിയായ അലീസിയ ബാബ്റോവാണ് ഭരണകൂടത്തിനെതിരെ രംഗത്തെത്തിയിരിക്കുന്നത്. പകര്പ്പവകാശ നിയമ പ്രകാരമാണ് ചിത്രകാരി പരാതി നല്കിയിരിക്കുന്നത്.
2019 -ല് അലീസിയ ബാബ്റോവ് വരച്ച ചിത്രം 2020- ലെ ഈസ്റ്റര് സ്റ്റാമ്പുകളില് ഉപയോഗിച്ചുവെന്നാണ് പരാതിയില് ഉന്നയിച്ചിരിക്കുന്നത്. അലിസീയ വരച്ച പ്രത്യേക തരം ഹൃദയത്തിന്റെ രൂപമാണ് ഈസ്റ്റര് സ്റ്റംപുകളില് ഉപയോഗിച്ചിരിക്കുന്നത്. തന്റെ അറിവോ,അനുവാദമോ ഇല്ലാതെയാണ് ചിത്രത്തിന്റെ പകര്പ്പ് ഉപയോഗിച്ചതെന്നും, ആ ചിത്രത്തിലൂടെ താന് ഉദ്ദേശിച്ച ലക്ഷ്യങ്ങളെയും വത്തിക്കാന് ലംഘിച്ചിരിക്കുകയാണെന്നും അലിസീയ ആരോപിച്ചു.
2013-ല് അലീസിയ ആരംഭിച്ച 'Just Use It' എന്ന ക്യാമ്പെയ്നിന്റെ ഭാഗമായി തെരുവുകളില് വിവിധ മതവിഭാഗങ്ങളുടെ ആരാധനാമൂര്ത്തികളെ വരച്ചിരുന്നു. ബുദ്ധന്റെയും, യേശുവിന്റെയും, വിഘ്നേശ്വരന്റെയും മേരിയുടെയുമെല്ലാം ചിത്രങ്ങളും ഇതിന്റെ ഭാഗമായി വരച്ചിരുന്നു. ഈ ക്യാമ്പയിന്റെ ഭാഗമായി 2019 ഫെബ്രുവരിയില് അലീസിയ ചെയ്ത യേശുവിന്റെ ആര്ട്ട് വര്ക്കിലെ ഹൃദയത്തിന്റെ രൂപമാണ് വത്തിക്കാന് പുറത്തിറക്കിയ സ്റ്റാമ്പുകളിലുള്ളത്.