ഡല്‍ഹി: മാഗി നൂഡില്‍സുള്‍പ്പെടെ വിപണിയിലുളള തങ്ങളുടെ 60 ശതമാനം ഭക്ഷ്യേത്പന്നങ്ങളും ആരോഗ്യത്തിന് ഗുണകരമല്ലെന്ന് സ്വിസ് ഭക്ഷ്യ നിര്‍മാതാക്കളായ നെസ്‌ലെ. 'ആരോഗ്യത്തിന്റ അംഗീകൃത നിര്‍വചനം' കണ്ടെത്തുന്നതില്‍ പരാജയപ്പെടുന്നുവെന്നാണ് കമ്പനിയുടെ റിപ്പോര്ട്ട്. തങ്ങളുടെ ഉല്‍പ്പന്നങ്ങള്‍ ആരോഗ്യത്തിനു നല്ലതും പോഷക ഗുണങ്ങളുമുളളതാക്കാക്കുന്നതിനായി രൂപീകരിച്ച പദ്ധതിയുടെ ഭാഗമായി രഹസ്യമായി ഉയര്‍ന്ന തസ്തികയിലുളള ഉദ്യോഗസ്ഥര്‍ക്ക് കമ്പനി അയച്ച റിപ്പോര്‍ട്ടാണ് പുറത്തായത്. ഫൈനാന്‍ഷ്യല്‍ ടൈംസ് എന്ന ബ്രിട്ടീഷ് പത്രമാണ് റിപ്പോര്ട്ട് പ്രസിദ്ധീകരിച്ചത്.
ലോകത്തിലെ തന്നെ ഏറ്റവും വലിയ ഭക്ഷ്യോത്പന്ന കമ്പനിയായ നെസ്‌ലെയുടെ ഭക്ഷ്യ- പാനീയ ഉല്‍പ്പന്നങ്ങളില്‍ അറുപത് ശതമാനവും ആരോഗ്യത്തിന്റെ അംഗീകൃത നിര്‍വചനം പാലിക്കുന്നില്ല. ചില ഉല്‍പ്പന്നങ്ങള്‍ എത്ര തന്നെ മാറ്റി ഉല്‍പ്പാദനം നടത്താന്‍ ശ്രമിച്ചാലും ആരോഗ്യത്തിന് നല്ലതായിരിക്കില്ലെന്നും റിപ്പോര്‍ട്ടില്‍ വ്യക്തമാക്കുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇതാദ്യമായല്ല നെസ് ലെയ്ക്ക് ഇന്ത്യയില്‍ ഇത്തരമൊരു പ്രതിസന്ധി നേരിടേണ്ടിവരുന്നത്. 2014-ല്‍ ഉത്തര്‍പ്രദേശിലെ ഒരു ഗ്രാമത്തില്‍ നടത്തിയ പരിശോധനയില്‍ മാഗി നൂഡില്‍സില്‍ കൂടിയ അളവില്‍ മോണോസോഡിയം ഗ്ലൂടാമേറ്റ് കണ്ടെത്തിയിരുന്നു. തുടര്‍ന്ന് 38,000 ടണ്‍ നൂഡില്‍സാണ് കമ്പനിക്ക് വിപണിയില്‍ നിന്ന് പിന്‍വലിക്കേണ്ടിവന്നത്.
ആഗോളതലത്തില്‍ നെസ്‌ലെയുടെ മാഗി നൂഡില്‍സ്, കിറ്റ് കാറ്റ്, നെസ്‌കഫേ തുടങ്ങിയ ഉല്‍പ്പന്നങ്ങള്‍ക്ക് വലിയ സ്വീകര്യതയാണുളളത്. ഇന്ത്യയില്‍ നെസ് ലെയ്ക്ക് എട്ട് ഉല്‍പ്പാദക യൂണിറ്റുകളുണ്ട്. 2020-ല്‍ നെസ് ലെയ്ക്ക് ഇന്ത്യയില്‍ നിന്ന് മാത്രം 13,290 കോടി രൂപയാണ് വരുമാനം ലഭിച്ചത്.
