മാധ്യമപ്രവർത്തനത്തിനുള്ള ഈ വർഷത്തെ പുലിറ്റ്സർ പുരസ്കാരങ്ങൾ പ്രഖ്യാപിച്ചു. അമേരിക്കയിൽ ജോർജ്ജ് ഫ്ലോയിഡിന്റെ കൊലപാതകം ചിത്രീകരിച്ച കൗമാരക്കാരി ഡാർനെല്ല ഫ്രേസിയര്‍ പുലിറ്റ്സർ പ്രത്യേക പുരസ്കാരത്തിന് അർഹനായി. 2020 മെയ് 25 ന് ഫ്ലോയിഡിന്റെ കൊലപാത വാർത്ത പുറത്തുവിട്ട മിനിയാപൊളിസിലെ സ്റ്റാർ ട്രിബ്യൂണ്‍ മികച്ച ബ്രേക്കിംഗ് ന്യൂസിനുള്ള അവാർഡ് നേടി.
ബോസ്റ്റൺ ഗ്ലോബിലെ മാറ്റ് റോച്ചിലിയോ, വെർണൽ കോൾമാൻ, ലോറ ക്രിമാൽഡി, ഇവാൻ അല്ലെൻ, ബ്രണ്ടൻ മക്കാർത്തി എന്നിവർ അന്വേഷണാത്മക മാധ്യമപ്രവർത്തനത്തിനുള്ള അവാർഡ് നേടി. അപകടകാരികളായ ട്രക്ക് ഡ്രൈവർമാരെയും, ഇവരെ നിയന്ത്രിക്കാൻ പരാജയപ്പെട്ട സർക്കാർ സംവിധാനത്തെയും കുറിച്ചുള്ള റിപ്പോർട്ടാണ് അവാർഡിന് അർഹമായത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പ്രാദേശിക മാധ്യമ പ്രവർത്തനത്തിന് ദി ടമ്പ ബേ ടൈംസിന്റെ നീൽ ബേഡിയും കാത്‌ലീൻ മക്‌ഗ്രോറിയും അവാർഡിന് അർഹരായി. ഇന്റർനാഷണൽ റിപ്പോർട്ടിംഗ് അവാർഡ് ബസ് ഫീഡ് ന്യൂസിലെ മാധ്യമപ്രവർത്തകരായ മേഘ രാജഗോപാലൻ, അലിസൺ കില്ലിംഗ് ക്രിസ്റ്റോ ബുഷെക് എന്നിവർ നേടി. തമിഴ്നാട്ടിൽ വേരുകളുള്ള മാധ്യമ പ്രവർത്തകയാണ് മേഘ രാജഗോപാൽ.
മികച്ച എഡിറ്റോറിയലിന് ലോസ് ആഞ്ചൽ ടൈസിലെ റോബർട്ട് ഗ്രീനെ പുരസ്കാരം നേടി. ബ്രേക്കിംഗ് ഫോട്ടോഗ്രാഫി പുരസ്കാരം അസോസിയേറ്റഡ് പ്രസിലെ മാധ്യമ പ്രവർത്തകർക്കാണ് ലഭിച്ചത്. വിവിധ മേഖലകളിലെ മികവിന് 22 അവർഡുകളാണ് പ്രഖ്യാപിച്ചത്. ഏപ്രിൽ മാസത്തിലാണ് പുരസ്കാരങ്ങൾ പ്രഖ്യാപിക്കേണ്ടിയിരുന്നത്. കൊവിഡ് സാഹചര്യത്തിൽ ജൂറി അംഗങ്ങളുടെ സൗകര്യം പരിഗണിച്ച് പുരസ്കാര പ്രഖ്യാപനം ജൂണിലേക്ക് മാറ്റുകയായിരുന്നു. കൊളംബിയ യൂണിവേഴ്സിറ്റിയിൽ നടക്കേണ്ട പുരസ്കാര വിതരണ ചടങ്ങും മാറ്റിവെച്ചിട്ടുണ്ട്.
