മൂന്ന് അമേരിക്കൻ പത്രങ്ങളിലെ മാധ്യമപ്രവർത്തകരുടെ യോഗ്യത റദ്ദാക്കുമെന്ന് ചൈന. നേരത്തെ ചൈനീസ് സര്ക്കാറിന്റെ ഉടമസ്ഥതയിലുള്ള മാധ്യമങ്ങളിൽ ജോലി ചെയ്യുന്ന ചൈനീസ് പൗരന്മാർക്ക് അമേരിക്ക നിയന്ത്രണങ്ങൾ ഏർപ്പെടുത്തിയിരുന്നു. അതിനോടുള്ള പ്രതികാര നടപടിയുടെ ഭാഗമായാണ് ന്യൂയോർക്ക് ടൈംസ്, വാൾസ്ട്രീറ്റ് ജേണൽ, വാഷിംഗ്ടൺ പോസ്റ്റ് എന്നീ പത്രങ്ങളിൽ ജോലി ചെയ്യുന്ന യുഎസ് മാധ്യമപ്രവർത്തകർ 2020 അവസാനിക്കുന്നതിന് മുമ്പ് അവരുടെ പ്രസ് കാർഡുകൾ തിരികെ നൽകണമെന്ന് ബീജിംഗ് ആവശ്യപ്പെടുന്നത്. നടപടി എത്ര പത്രപ്രവർത്തകരെ ബാധിക്കുമെന്ന് ഇപ്പോള് വ്യക്തമല്ല.
വിദേശ ദൗത്യങ്ങള്ക്കായി ചൈന ഏര്പ്പാടു ചെയ്ത അഞ്ച് ചൈനീസ് മാധ്യമങ്ങളില് ജോലി ചെയ്യുന്ന മാധ്യമ പ്രവര്ത്തകര്ക്കാണ് അമേരിക്ക നിയന്ത്രണം ഏര്പ്പെടുത്തിയിരിക്കുന്നത്. 'യുക്തിരഹിതമായ ഈ അടിച്ചമർത്തൽ നടപടികളോടുള്ള പ്രതികാരമായിതന്നെയാണ് അമേരിക്കന് മാധ്യമ പ്രവര്ത്തകര്ക്ക് വിലക്കേര്പ്പെടുത്തിയത്' എന്ന് ബീജിംഗ് പ്രതികരിച്ചു. COVID-19 പാൻഡെമിക് നിർണായകമായ ഈ സമയത്ത് ഇത്തരം നീക്കങ്ങള് വിവര കൈമാറ്റത്തെ തടസ്സപ്പെടുത്താൻ സാധ്യതയുണ്ടെന്ന് ആംനസ്റ്റി ഇന്റർനാഷണൽ പറയുന്നു.