സാമൂഹിക അകലം പാലിക്കുന്നത് അടക്കമുള്ള ഫെഡറൽ കൊറോണ വൈറസ് മാർഗ്ഗനിർദ്ദേശങ്ങൾ ഏപ്രിൽ 30 വരെ നീട്ടുന്നതായി ട്രംപ്. നേരത്തെ, സാമൂഹിക അകലം പാലിക്കുന്നത് പെട്ടെന്ന് അവസാനിപ്പിച്ച് അമേരിക്കയെ സാധാരണ നിലയിലേക്ക് കൊണ്ടുവരാനാണ് താന് പരിശ്രമിക്കുന്നതെന്ന് ട്രംപ് പറഞ്ഞിരുന്നു. 'അടുത്ത രണ്ടാഴ്ചക്കുള്ളില് മരണനിരക്ക് കുത്തനെ ഉയര്ന്നേക്കാം' എന്ന് ഇപ്പോള് അദ്ദേഹം മുന്നറിയിപ്പ് നല്കുന്നു. ഇങ്ങനെപോയാല് കൊവിഡ് മൂലം രണ്ടുലക്ഷം അമേരിക്കക്കാരെങ്കിലും മരിക്കുമെന്ന് വൈറ്റ് ഹൌസ്സ് മെഡിക്കൽ ഉപദേഷ്ടാവ് ഡോ. ആന്റണി ഫൌസി നേരത്തെ മുന്നറിയിപ്പ് നൽകിയിരുന്നു.
ഇപ്പോഴത്തെ അവസ്ഥയില് ദശലക്ഷക്കണക്കിന് അമേരിക്കക്കാർക്ക് രോഗം വരുമെന്ന് ഏതാണ്ട് അനുമാനിക്കാമെന്ന് ഫൌസി പറയുന്നു. യുഎസിൽ ഇപ്പോൾ 140,000 ത്തിലധികം കേസുകൾ സ്ഥിരീകരിച്ചിട്ടുണ്ട്. ജോൺസ് ഹോപ്കിൻസ് സർവകലാശാലയുടെ കണക്കുകൾ പ്രകാരം ഞായറാഴ്ച വൈകുന്നേരം വരെ രാജ്യത്ത് 2,493 മരണങ്ങൾ റിപ്പോർട്ട് ചെയ്തിട്ടുണ്ട്. റിപ്പോർട്ട് ചെയ്യപ്പെട്ട കേസുകളുടെ എണ്ണത്തിൽ അമേരിക്ക കഴിഞ്ഞയാഴ്ച ചൈനയെയും ഇറ്റലിയെയും മറികടന്നിരുന്നു.