ഡല്ഹി: രാഷ്ട്രപതി, ഉപരാഷ്ട്രപതി പദവികളിലേക്കൊന്നില് കേരള ഗവര്ണര് ആരിഫ് മുഹമ്മദ് ഖാനെ പരിഗണിയ്ക്കാന് ബിജെപി ആലോചിക്കുന്നു. 2017-ല് രാഷ്ട്രപതി പദത്തിലെത്തിയ രാം നാഥ് കോവിന്ദിന്റെ കാലാവധി അടുത്ത ജൂലൈയില് അവസാനിക്കുന്ന മുറയ്ക്കാണ് തെരഞ്ഞെടുപ്പ് നടക്കുക. നിലവില് ഉപരാഷ്ട്രപതിയായ വെങ്കയ്യ നായിഡു തന്നെയാണ് ബിജെപിയുടെ പ്രഥമ പരിഗണന എന്നാണ് റിപ്പോര്ട്ട്. മുന് കേന്ദ്രമന്ത്രിയും ബിജെപി അധ്യക്ഷനുമായ വെങ്കയ്യ നായിഡു രാഷ്ട്രപതി സ്ഥാനത്തേക്ക് മത്സരിക്കുകയാണെങ്കില് കേരള ഗവര്ണര് ആരിഫ് മുഹമ്മദ് ഖാന്, കര്ണാടക ഗവര്ണര് തവാച്ചന്ത് ഗെഹ്ലോട്ട് തുടങ്ങിയവരുടെ പേരുകള് ഉപരാഷ്ട്രപതി സ്ഥാനത്തേക്ക് പരിഗണിക്കപ്പെടുമെന്നാണ് അറിയുന്നത്. ദളിത് സ്ത്രീ പരിഗണന വന്നാല് അനസൂയ ഉയ്കെ, ദ്രൌപതി മുര്മു എന്നിവരും പരിഗണിക്കപ്പെട്ടേക്കാം.
അതേസമയം വരാനിരിക്കുന്ന രാഷ്ട്രപതി തെരഞ്ഞെടുപ്പില് ബിജെപിയ്ക്കെതിരെ പൊതു സ്ഥാനാര്ത്ഥിയെ നിര്ത്താന് പ്രതിപക്ഷത്ത് ആലോചന. മഹാരാഷ്ട്ര കേന്ദ്രീകരിച്ചാണ് ഈ ആശയം ഉടലെടുത്തത്. എന് സി പി നേതാവ് ശരത് പവാറിന്റെ നേതൃത്വത്തില് ഇതിനായുള്ള ചര്ച്ചകള് പുരോഗമിക്കുകയാണ്. ബിജെപിയുടെ കടുത്ത ശത്രുവായി മാറിക്കഴിഞ്ഞ ശിവസേന, എന് സി പി കോണ്ഗ്രസ് നേതൃത്വങ്ങള് തമ്മില് ഇതുസംബന്ധിച്ച് ചര്ച്ചകള് ആരംഭിച്ചുകഴിഞ്ഞു എന്നാണ് റിപ്പോര്ട്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
രണ്ടുവര്ഷത്തിനുശേഷം (2024)ല് നടക്കുന്ന ലോക്സഭാ തെരഞ്ഞെടുപ്പിന് പ്രതിപക്ഷത്തെ സജ്ജമാക്കുക എന്ന അജണ്ടയുടെ ഭാഗമായാണ് പൊതുസ്ഥാനാര്ഥിയെ നിര്ത്താന് പ്രതിപക്ഷത്തെ പ്രബല കക്ഷികള് ആലോചിക്കുന്നത്. സിപിഎം, സിപിഐ തുടങ്ങിയ ഇടതുകക്ഷികള്, തെലങ്കാനയിലെ ടി ആര് എസ്, ഡി എം കെ, പ്രബല കക്ഷികള് ഈ നീക്കവുമായി സഹകരിച്ചാല് അത് വലിയ വിജയമാകുമെന്നാണ് കണക്കുകൂട്ടല്. ഇതിന്റെ ഭാഗമായി എല്ലാവര്ക്കും സ്വീകാര്യനായ ഒരാളെ സ്ഥാനാര്ഥിയാക്കാനാണ് ആലോചന നടക്കുന്നത്.
