തെലുങ്കാന: കേന്ദ്രസര്ക്കാരിന്റെ അഗ്നിപഥ് പദ്ധതിക്കെതിരെ നടന്ന പ്രതിഷേധത്തിന് നേരെയുണ്ടായ പൊലീസ് വെടിവെപ്പില് ഒരാള് കൊല്ലപ്പെട്ടു. തെലങ്കാനയിലെ സെക്കന്തരാബാദിൽ നടന്ന പ്രതിഷേധത്തിനിടയിലാണ് വെടിവെപ്പുണ്ടായത്. വെടിവെപ്പില് നിരവധിയാളുകള്ക്ക് പരിക്കേറ്റിട്ടുണ്ട്. സെക്കന്തരാബാദ് റെയിൽവേ സ്റ്റേഷനിൽ പ്രതിഷേധക്കാർ ട്രെയിനിന് തീയിട്ടു. സ്റ്റേഷനകത്തെ സ്റ്റാളുകളും ഓഫീസിന്റെ ജനൽച്ചില്ലുകളും തകർത്തു. ട്രെയിനുകൾക്ക് നേരെ കല്ലേറുമുണ്ടായി. സൈന്യത്തില് കരാര് നിയമനം നടത്താനുള്ള നീക്കത്തിനെതിരെയാണ് രാജ്യത്താകമാനം പ്രതിഷേധം ആരംഭിച്ചിരിക്കുന്നത്.
പതിനേഴര വയസ് പ്രായമായ കുട്ടികളെ നാലുവര്ഷക്കാലത്തേക്ക് ഇന്ത്യന് സൈന്യത്തിന്റെ ഭാഗമാക്കുന്നതാണ് പദ്ധതി. ഇങ്ങനെ തെരഞ്ഞെടുക്കപ്പെടുന്നവര് 'അഗ്നിവീരന്മാര്' എന്ന് അറിയപ്പെടും. ഈ വര്ഷം ആരംഭിക്കുന്ന പദ്ധതിയില് 46000 പേരെ തുടക്കത്തില് റിക്രൂട്ട് ചെയ്യാനാണ് കേന്ദ്രസര്ക്കാര് തീരുമാനം. അഗ്നിവീരന്മാരായി തെരഞ്ഞെടുക്കപ്പെടുന്നവര്ക്ക് പ്രതിമാസം മുപ്പതിനായിരം രൂപയാണ് ശമ്പളം. നാലുവര്ഷം കഴിഞ്ഞ് പിരിയുമ്പോള് 11.71 ലക്ഷം രൂപ ലഭിക്കും. നിയമനം ലഭിച്ചവരില് മികച്ച പ്രകടനം കാഴ്ച്ചവയ്ക്കുന്ന 25 ശതമാനം ആളുകളെ സൈന്യത്തില് സ്ഥിരപ്പെടുത്തും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കേന്ദ്രസര്ക്കാരിന്റെ ഈ പദ്ധതിക്കെതിരെ വിവിധ രാഷ്ട്രീയ നേതാക്കള് രംഗത്തെത്തി. അഗ്നിപഥ് ബിജെപിക്ക് വേണ്ടി സ്വകാര്യ സേനയെ ഒരുക്കാനുള്ള കേന്ദ്രസര്ക്കാരിന്റെ നീക്കമാണെന്ന് സിപിഎം ജനറല് സെക്രട്ടറി സീതാറാം യെച്ചൂരി പറഞ്ഞു. പാര്ലമെന്റില് പോലും ചര്ച്ച ചെയ്യാത്ത പദ്ധതി പിന്വലിക്കണമെന്നും അദ്ദേഹം ആവശ്യപ്പെട്ടു. ജനങ്ങളെ വിഡ്ഢികളാക്കരുതെന്നും ബിജെപിയുടെ പുതിയ തന്ത്രങ്ങളില് ഒന്നാണ് ഇതെന്നും മുന് കേന്ദ്രമന്ത്രി കപില് സിബല് പറഞ്ഞു. ആസൂത്രണങ്ങളില്ലാതെ, ധൃതിയില് തീരുമാനമെടുത്ത് യുവാക്കളെ ഭയപ്പെടുത്തുകയാണ് മോദി സര്ക്കാര് ചെയ്തത്. പദ്ധതി എത്രയുംവേഗം പിന്വലിച്ച് മുന്പത്തെ പോലെ ആര്മി റിക്രൂട്ട്മെന്റ് കൊണ്ടുവരണമെന്ന് കോണ്ഗ്രസ് നേതാവ് പ്രിയങ്കാ ഗാന്ധി ആവശ്യപ്പെട്ടു.
