നരേന്ദ്രമോദി പ്രധാനമന്ത്രിക്ക് ചേർന്ന രീതിയിൽ പെരുമാറാൻ പഠിക്കണമെന്ന് രാഹുൽ ഗാന്ധി. പ്രധാനമന്ത്രി പദത്തിൽ ഇരിക്കുന്നവരിൽ നിന്ന് നാം പ്രതീക്ഷിക്കുന്ന ചില മാന്യതകൾ ഉണ്ടെന്നും രാഹുൽ ഗാന്ധി പറഞ്ഞു. എന്നാൽ മോദിയുടെ രീതി പ്രധാനമന്ത്രി പദത്തിന് ചേർന്നതല്ലെന്നും അദ്ദേഹം കൂട്ടിച്ചേര്‍ത്തു. പാർലമെന്റിൽ രാഷ്ട്രപതിയുടെ നയപ്രഖ്യാപനത്തിന്മേലുള്ള ചർച്ചക്കിടെ നരേന്ദ്രമോദിയുടെ വിവാദമായ ട്യൂബ് ലൈറ്റ് പരാമർശത്തോട് പ്രതികരിക്കുകയായിരുന്നു രാഹുൽ ഗാന്ധി.
'ആസൂത്രിതമായി ബഹളം വെച്ച് സർക്കാറിനെതിരെ ലോക്സഭയിൽ ചോദ്യം ചോദിക്കുന്നവരെ തടയുകയാണ്' രാഹുൽ ആരോപിച്ചു. പ്രതിപക്ഷത്തിന്റെ ശബ്ദം അടിച്ചമർത്താനുള്ള ശ്രമമാണ് ലോക്സഭയിൽ നടക്കുന്നതെന്നും അദ്ദേഹം പറഞ്ഞു. രാഹുൽ ഗാന്ധിയെ കുറിച്ചുളള ബിജെപി എം.പി ഹർഷവർദ്ധന്റെ പ്രസ്താവനക്കെതിരെ പ്രതിപക്ഷ ബഹളത്തിൽ ലോക്സഭാ നടപടികൾ തടസ്സപ്പെട്ടു. തുടർന്ന് ഉച്ചക്ക് രണ്ട് മണിവരെ നടപടികൾ സ്പീക്കർ നിർത്തിവെച്ചു.
