ട്രാൻസ്ജൻഡർ വിഭാഗത്തെ സേനയിൽ ഉൾപ്പെടുത്താനൊരുങ്ങി CRPF. ആഭ്യന്തര മന്ത്രാലയം ഇക്കാര്യം നിര്ദ്ദേശിച്ചതിനെത്തുടര്ന്നാണ് CRPF പുതിയ റിക്രൂട്ടുകളെ സ്വാഗതം ചെയ്യാന് തീരുമാനിച്ചത്. ട്രാൻസ്ജൻഡർ വിഭാഗത്തെ മൂന്നാം ലിംഗമായി അംഗീകരിച്ച സുപ്രീം കോടതിയുടെ വിധിയെ പൂർണ്ണമായും മാനിക്കുന്നുവെന്നും മുൻപേതന്നെ സേനയിൽ ലിംഗഭേദങ്ങൾ കണക്കാക്കാറില്ലെന്നും ആഭ്യന്തര മന്ത്രാലയത്തിന്റെ അഭിപ്രായപ്രകാരം മാറ്റങ്ങൾ വരുത്താൻ തയ്യാറാണെന്നും CRPF പറഞ്ഞു. 2014 ഏപ്രിൽ 15ന് പ്രസ്താവിച്ച സുപ്രീം കോടതി വിധിയെയാണ് CRPF പരാമര്ശിച്ചത്.
സൈന്യത്തിലേക്ക് ട്രാൻസ്ജൻഡർ വിഭാഗത്തെ ഉൾപ്പെടുത്തണമെന്ന ആവശ്യം ഉന്നയിച്ച് വിവിധ സേനകള്ക്ക് ആഭ്യന്തര മന്ത്രാലയം കത്തയച്ചിരുന്നു. ഇതിനെത്തുടര്ന്ന് BSF അസിസ്റ്റൻഡ് കമാൻഡർ തസ്തികയിലേക്ക് ട്രാൻസ്ജൻഡർ വിഭാഗത്തെ നിയമിക്കാമെന്ന് അംഗീകരിച്ചിരുന്നു.
"SSF'ഉം ITBP'യും അനുകൂലമായ മറുപടി തരുമെന്നാണ് പ്രതീക്ഷ. നടപ്പാക്കുന്നതില് വ്യത്യസ്ത സേനകള്ക്ക് സ്വതന്ത്രമായി തീരുമാനമെടുക്കാം " ആഭ്യന്തര മന്ത്രാലയ വക്താവ് അറിയിച്ചു. തുടക്കത്തില് ജനറൽ പോസ്റ്റുകളിലേക്കായിരിക്കും നിയമനം. പിന്നീട് ഉയർന്ന തസ്തികകളിലേക്കും ഇവരെ നിയമിക്കും.