താന് ആര്എസ്എസ് ശാഖയില് പോയിട്ടില്ലെന്ന് നടന് ശ്രീനിവാസന്. പഠിക്കുന്ന കാലത്ത് എബിവിപി പ്രവര്ത്തകനായിരുന്നുവെന്ന് പി. ജയരാജന് ആരോപണം ഉന്നയിച്ചപ്പോള് ഇക്കാര്യത്തില് മറുപടി നല്കിയതാണെന്നും ശ്രീനിവാസന് പറഞ്ഞു.
1968 ല് മട്ടന്നൂര് പഴശ്ശിരാജ എന്എസ്എസ് കോളെജില് പഠിക്കുന്ന കാലത്ത് ശ്രീനിവാസന് ശാഖയിലേക്ക് പോയിരുന്നുവെന്ന ‘അംബേദ്കറൈറ്റ് മുസ്ലീം ജീവിതം പോരാട്ടം’ എന്ന പുസ്തകത്തില് വി. പ്രഭാകരന് എഴുതിയത് വലിയ വാര്ത്തയായിരുന്നു. ശ്രീനിവാസന് കൃത്യമായി രാഷ്ട്രീയം മനസിലാക്കുന്ന വ്യക്തിയല്ല, ചാഞ്ചാട്ടക്കാരനാണെന്നായിരുന്നു പി. ജയരാജന്റെ വിമര്ശനം. ഇതിന് മറുപടിയായി ‘അല്പം പോലും ബുദ്ധിയില്ലാത്ത സമയത്ത് ഞാന് എസ്എഫ്ഐയോട് ആഭിമുഖ്യമുള്ള ആളായിരുന്നു. കുറച്ച് കൂടി ബുദ്ധി വെച്ചപ്പോള് കെഎഎസ് യുക്കാരനായി. അല്പം കൂടി ബുദ്ധി വെച്ചപ്പോള് എബിവിപിക്കാരനായി. സാമാന്യ ബുദ്ധി വെച്ചപ്പോള് ട്വന്റി ട്വന്റിക്കാരനായി. എനിക്ക് തോന്നിയാല് ഇവിടെ നിന്നും മാറും എന്നായിരുന്നു ശ്രീനിവാസന്റെ പ്രതികരണം.
‘മട്ടന്നൂര് കോളെജില് പഠിക്കുന്ന കാലത്ത് താനടക്കം ആര്ക്കും രാഷ്ടീയത്തിന്റെ മണ്ണാങ്കട്ടയും അറിയില്ല. അക്കാലത്ത് താനൊരു മണ്ടനായിരുന്നു. കൂട്ടുകാര് പറയുന്നതിനനുസരിച്ച് ചാടി കളിച്ച കാലമാണിത്. ഇഷ്ടമുള്ള ആളുകള് കെഎസ്യുവില് ഉണ്ടായിരുന്നു. അപ്പോള് അവരോടൊപ്പം കെഎസ്യുക്കാരനായി. അതുപോലെ എസ്എഫ്ഐ, എബിവിപി തുടങ്ങിയ വിദ്യാര്ത്ഥി സംഘടനകളിലും പോയി. അതെല്ലാം ഭയങ്കര രാഷ്ട്രീയമാണെന്ന് പറയുന്നവര്ക്ക് വട്ടാണ്' എന്നും അദ്ദേഹം പറയുന്നു.
