മൈക്രോസോഫ്റ്റിന്റെ സഹസ്ഥാപകനും സാങ്കേതിക ഉപദേശകനുമായ ബില് ഗേറ്റ്സ് ഡയറക്ടര് ബോര്ഡില് നിന്ന്പടിയിറങ്ങിയതായി മൈക്രോസോഫ്റ്റ് അറിയിച്ചു, അതേ സമയം സിഇഒ സത്യ നാഡെല്ലയുടെയും മറ്റ് എക്സിക്യൂട്ടീവുകളുടെയും സാങ്കേതിക ഉപദേഷ്ടാവായി അദ്ദേഹം തുടരും. 1975-ലാണ് ബില് ഗേറ്റ്സും സുഹൃത്ത് പോള് അലനും ചേര്ന്ന് മൈക്രോസോഫ്റ്റ് സ്ഥാപിക്കുന്നത്. ലോകത്തിലെ ഏറ്റവും വലിയ സോഫ്റ്റ്വെയർ നിർമ്മാണ കമ്പനിയാക്കി മൈക്രോസോഫ്റ്റിനെ മാറ്റിയ ബില് ഗേറ്റ്സ് പടിയിറങ്ങുമ്പോള് ഐതിഹാസികമായ ഒരധ്യായത്തിനാണ് വിരാമമാകുന്നത്.
64 കാരനായ ഗേറ്റ്സ് ഒരു പതിറ്റാണ്ടിലേറെയായി മൈക്രോസോഫ്റ്റിന്റെ ദൈനംദിന കാര്യങ്ങളില് ഇടപെടാതെ മാറിനില്ക്കാന് തുടങ്ങിയിട്ട്. എന്നാല്, ഉൽപാദനക്ഷമത, ആരോഗ്യ സോഫ്റ്റ്വെയർ, ആർട്ടിഫിഷ്യൽ ഇന്റലിജൻസ് എന്നിവയുൾപ്പെടെയുള്ള സാങ്കേതിക മേഖലകളെക്കുറിച്ച് നിലവിലെ ചീഫ് എക്സിക്യൂട്ടീവ് ഓഫീസർ സത്യ നാദല്ലെക്ക് വേണ്ട ഉപദേശങ്ങള് നല്കി അദ്ദേഹം കൂടെയുണ്ട്. അതിനിയും തുടരുമെന്ന് സത്യ നാദല്ല പറഞ്ഞു.
'മൈക്രോസോഫ്റ്റ് എല്ലായ്പ്പോഴും എന്റെ ജീവിതത്തിന്റെ ഒരു പ്രധാന ഭാഗമായിരിക്കും എന്നു പറഞ്ഞ ബില് ഗേറ്റ്സ് കമ്പനിയുടെ ലക്ഷ്യങ്ങള് പൂര്ത്തീകരിക്കുന്നതിനും കാഴ്ചപ്പാട് രൂപപ്പെടുത്തുന്നതിനും എപ്പോഴും കൂടെ ഉണ്ടായിരിക്കുമെന്നും പറഞ്ഞു.