ഗുണ്ടാ സംഘങ്ങളുടെ ചേരി തിരിഞ്ഞുളള കൂട്ടത്തല്ലുകള് നാം സിനിമകളില് മാത്രമാണ് കാണാറുളളത് എന്നാല് തായ്ലന്റുകാര്ക്ക് അത്തരമൊരു ഗാങ് വാര് നേരില് കാണാനായി. മനുഷ്യന്മാര് തമ്മിലല്ല മറിച്ച് കുരങ്ങന്മാര് തമ്മിലുളള കൂട്ടത്തല്ലിനാണ് തായ്ലന്റുകാര് സാക്ഷ്യം വഹിച്ചത്. നൂറുകണക്കിന് കുരങ്ങന്മാര് കൂട്ടത്തോടെ റോഡിലിറങ്ങി രണ്ട് ചേരിയായി തിരിഞ്ഞായിരുന്നു കൂട്ടത്തല്ല്. മധ്യ തായ്ലന്റിലെ ലോപ്ബൂരി നഗരത്തിലാണ് കുരങ്ങന്മാരുടെ ഈ കൂട്ടത്തല്ല് നടന്നത്. വാനരസംഘങ്ങളുടെ ഈ കുട്ടത്തല്ല് മൂലം നാലുമിനിറ്റോളമാണ് ഗതാഗതം സ്തംഭിച്ചത്.
നഗരത്തിലെ തിയറ്ററിനടുത്ത് താമസമാക്കിയ കുരങ്ങന്മാരും പുരാതന ബുദ്ധ ക്ഷേത്രത്തിന്റെ മൈതാനത്ത് താമസിക്കുന്ന കുരങ്ങന്മാരുടെ സംഘവും തമ്മിലാണ് തല്ലുണ്ടായതെന്ന് കാഴ്ച്ചക്കാരിലൊരാള് പറഞ്ഞു. വാഹനങ്ങളിലുണ്ടായിരുന്നവര് ശബ്ദമുണ്ടാക്കാതെ അവരവരുടെ വണ്ടികളില് തന്നെ ഇരിക്കുകയായിരുന്നു.
നഗരത്തില് എത്തുന്ന വിനോദസഞ്ചാരികള് കൊടുക്കുന്ന ഭക്ഷണം കഴിച്ച് സമാധാനപരമായി ജീവിക്കുന്നവരായിരുന്നു ഇവിടത്തെ കുരങ്ങന്മാര് എന്നാല് കൊവിഡിന്റെ രണ്ടാം തരംഗം ശക്തമായത് വിനോദസഞ്ചാരമേഖയെയും സാരമായി ബാധിച്ചു. വിനോദസഞ്ചാരികള് എത്താതായതോടെ കുരങ്ങന്മാര് പട്ടിണിയായി. ഭക്ഷണം തേടി ഇവര് റോഡിലിറങ്ങാന് തുടങ്ങിയത് നാട്ടുകാര്ക്കും യാത്രക്കാര്ക്കും വലിയ ശല്യമായിരിക്കുകയാണ്.