പാലാ സെന്റ് തോമസ് കോളേജില്‍ വിദ്യാര്‍ത്ഥിയെ സഹപാഠി കഴുത്തറുത്ത് കൊന്ന സംഭവത്തില്‍ പ്രതികരണവുമായി നടി റിമാ കല്ലിങ്കല്‍. പെണ്‍കുട്ടികള്‍ ആണ്‍കുട്ടികളോട് കടപ്പെട്ടവരല്ലെന്ന് അവരെ പറഞ്ഞുമനസിലാക്കണമെന്ന് റിമ കല്ലിങ്കല്‍ പറഞ്ഞു. ഇന്‍സ്റ്റഗ്രാം പോസ്റ്റിലൂടെയായിരുന്നു നടിയുടെ പ്രതികരണം.
'പെണ്‍കുട്ടികള്‍ അവരോട് കടപ്പെട്ടവരല്ലെന്ന് ആണ്‍കുട്ടികളെ പഠിപ്പിക്കുക. പെണ്‍കുട്ടികള്‍ക്കും മറ്റെല്ലാ മനുഷ്യരേയും പോലെ വ്യതിചലിക്കാന്‍ സാധ്യതയുളള മനസുണ്ട്. അവള്‍ നിങ്ങളെ മുന്‍പ് സ്‌നേഹിച്ചിരുന്നിരിക്കാം. ഇപ്പോള്‍ പഴയതുപോലെ സ്‌നേഹിക്കുന്നുമില്ലായിരിക്കാം. നിങ്ങളുമായി സ്‌നേഹത്തിലായിക്കുമ്പോള്‍ തന്നെ അവള്‍ക്ക് ആ സ്‌നേഹമാവില്ല പരമപ്രധാനം. ഒരു വ്യക്തിയെന്ന നിലയില്‍ അവള്‍ക്ക് സ്വന്തം തീരുമാനങ്ങള്‍ക്കും ഭാവനയ്ക്കും തോന്നലുകള്‍ക്കുമനുസരിച്ച് ജീവിക്കാനുളള എല്ലാ വിധ അവകാശങ്ങളുമുണ്ട്, നിങ്ങള്‍ ആണുങ്ങളെപ്പോലെ. നിങ്ങളുടെ തേപ്പുകഥകളോടും പട്ടം ചാര്‍ത്തലുകളോടും പോവാന്‍ പറ' എന്നാണ് റിമാ കല്ലിങ്കല്‍ കുറിച്ചിരിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
വെളളിയാഴ്ച്ച രാവിലെയായിരുന്നു പാലാ സെന്റ് തോമസ് കോളേജില്‍ വിദ്യാര്‍ത്ഥിയെ സഹപാഠി കഴുത്തറുത്ത് കൊന്നത്. തലയോലപ്പറമ്പ് സ്വദേശി നിതിന മോളാണ് കൊല്ലപ്പെട്ടത്. സഹപാഠിയായ അഭിഷേക് ബൈജുവാണ് പെണ്‍കുട്ടിയെ ആക്രമിച്ച് കൊലപ്പെടുത്തിയത്. പ്രണയനൈരാശ്യമാണ് കൊലപാതകത്തിനുകാരണം. നിതിനയെ ദിവസങ്ങള്‍ നീണ്ട ആസൂത്രണത്തിനൊടുവിലാണ് കൊലപ്പെടുത്തിയതെന്നാണ് വിലയിരുത്തല്‍. പേപ്പര്‍ കട്ടറിലെ പഴയ ബ്ലേഡ് മാറ്റി പുതിയതിട്ടാണ് അഭിഷേക് എത്തിയത്. നിതിനയുടെ അമ്മയ്ക്കും പ്രതി ഭീഷണി സന്ദേശമയച്ചിരുന്നു. നിതിനയുടെ കഴുത്തിലേറ്റ മുറിവ് ആഴത്തിലും വീതിയിലുമുളളതാണെന്നാണ് പ്രാഥമിക നിഗമനം. രക്തധമനികള്‍ മുറിഞ്ഞ് രക്തം വാര്‍ന്നതാണ് മരണകാരണം.
