ചെന്നൈ: താന് ആശുപത്രിയില് ചികിത്സയിലായിരുന്ന സമയത്ത് സമൂഹമാധ്യമങ്ങളില് പ്രചരിച്ച ചിത്രങ്ങളും വാര്ത്തകളുമെല്ലാം സര്ഗാത്മകമായിരുന്നെന്ന് നടന് വിക്രം. ആര് അജയ് ജ്ഞാനമുത്തു സംവിധാനം ചെയ്യുന്ന കോബ്ര എന്ന സിനിമയുടെ ഓഡിയോ ലോഞ്ചിനിടെ സംസാരിക്കുകയായിരുന്നു അദ്ദേഹം. ആശുപത്രിവാസത്തിനുശേഷം അദ്ദേഹം ആദ്യമായി പങ്കെടുത്ത പരിപാടികൂടിയായിരുന്നു ഇത്.
'എന്നെ ആശുപത്രിയില് പ്രവേശിപ്പിച്ചതിനുപിന്നാലെ സമൂഹമാധ്യമങ്ങളിലും മറ്റ് മാധ്യമങ്ങളിലുമായി ഒരുപാട് തരത്തില് വാര്ത്തകള് പ്രചരിക്കുന്നുണ്ടായിരുന്നു. തമ്പ് നെയിലില് വയ്യാതെ കിടക്കുന്ന ഏതോ പാവം രോഗിയുടെ ശരീരത്തില് എന്റെ തലവെച്ച് ഫോട്ടോഷോപ്പ് ചെയ്ത് ചിലര് വാര്ത്തകള് കൊടുത്തിരുന്നു. അതൊക്കെ വളരെ ക്രിയേറ്റീവ് ആയിരുന്നു. എനിക്കിഷ്ടമായി. എന്തൊക്കെ നമ്മള് കാണുന്നു. ഇതൊന്നും ഒന്നുമല്ല'-ചിയാന് വിക്രം പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ജൂലൈ എട്ടിനാണ് നെഞ്ചുവേദനയെത്തുടര്ന്ന് വിക്രമിനെ ചെന്നൈ കാവേരി ആശുപത്രിയില് പ്രവേശിപ്പിച്ചത്. ഹൃദയാഘാതമാണ് സംഭവിച്ചതെന്ന തരത്തില് അഭ്യൂഹങ്ങളുണ്ടായിരുന്നു. എന്നാല് വിക്രമിന് ഹൃദയാഘാതമല്ലെന്നും നെഞ്ചില് ചെറിയ അസ്വസ്ഥത അനുഭവപ്പെട്ടതിനെത്തുടര്ന്നാണ് ആശുപത്രിയിലെത്തിച്ചതെന്നും വ്യക്തമാക്കി വിക്രമിന്റെ മകന് ധ്രുവ് വിക്രമും ആശുപത്രി അധികൃതരും രംഗത്തെത്തിയിരുന്നു.