ടോക്കിയോ: രാജ്യത്തെ യുവാക്കളെ മദ്യപിക്കാന്‍ പ്രേരിപ്പിക്കുന്ന പദ്ധതികളുമായി രംഗത്തെത്തിയിരിക്കുകയാണ് ജപ്പാന്‍ സര്‍ക്കാര്‍. കൊവിഡ് പ്രതിസന്ധി മൂലമുണ്ടായ ജനസംഖ്യാ ഇടിവും സാമ്പത്തിക നഷ്ടവും മറികടക്കാനാണ് യുവാക്കളോട് മദ്യപിക്കാന്‍ സര്‍ക്കാര്‍ ആഹ്വാനം ചെയ്യുന്നത്. നികുതി വരുമാനം കൂട്ടാനായി 'സാകേ വിവ' എന്ന പേരില്‍ മദ്യപാന മത്സരവും സംഘടിപ്പിക്കുന്നുണ്ട്. ഇരുപതുമുതല്‍ മുപ്പത്തിയൊമ്പത് വയസ് വരെ പ്രായമുളള യുവാക്കള്‍ക്കാണ് മത്സരത്തില്‍ പങ്കെടുക്കാനാവുക. ജപ്പാന്‍ നാഷണല്‍ ടാക്‌സ് ഏജന്‍സിയാണ് മത്സരം നടത്തുന്നത്. വൈന്‍, ഷോച്ചു, വിസ്‌കി, ബിയര്‍ തുടങ്ങിയ പാനീയങ്ങള്‍ക്ക് ഡിമാന്‍ഡുണ്ടാക്കാന്‍ മത്സരം സഹായിക്കുമെന്നാണ് സര്‍ക്കാര്‍ പ്രതീക്ഷിക്കുന്നത്.
ജാപ്പനീസ് ടാക്‌സ് ഏജന്‍സിയെക്കുറിച്ചുളള ബിബിസിയുടെ റിപ്പോര്ട്ട് പ്രകാരം, 1995-ല്‍ ജപ്പാനിലെ ജനങ്ങള്‍ പ്രതിവര്‍ഷം ശരാശരി നൂറുലിറ്റര്‍ വീതം മദ്യം കുടിച്ചിരുന്നു. എന്നാലത് 2020 ആയപ്പോഴേക്ക് 75 ലിറ്ററായി കുറഞ്ഞു. കാലക്രമേണ ആളുകള്‍ മദ്യപിക്കുന്നത് കുറഞ്ഞതോടുകൂടി മദ്യത്തില്‍നിന്നുളള നികുതിയും കുറഞ്ഞുതുടങ്ങി. 1980-കളില്‍ അഞ്ച് ശതമാനം ലഭിക്കുമായിരുന്ന മദ്യവില്‍പ്പനയില്‍ നിന്നുളള നികുതി 2020 ആയപ്പോഴേക്കും 1.7 ശതമാനമായി കുറഞ്ഞുവെന്നും ബിബിസി റിപ്പോര്‍ട്ടില്‍ പറയുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സര്‍ക്കാര്‍ മദ്യപാനം പ്രോത്സാഹിപ്പിക്കുന്നതിനെ എതിര്‍ത്തും അനുകൂലിച്ചും നിരവധിപേരാണ് രംഗത്തെത്തിയിരിക്കുന്നത്. സര്‍ക്കാര്‍ ഒരു ദുശീലത്തെ പ്രോത്സാഹിപ്പിക്കുക വഴി നിരുത്തരവാദിത്തപരമായാണ് പെരുമാറുന്നതെന്ന് ചിലര്‍ വിമര്‍ശിക്കുമ്പോള്‍ മറ്റുചിലര്‍ മത്സരത്തിലേക്കുളള അപേക്ഷകള്‍ അയച്ചുതുടങ്ങി.
