ജാപ്പനീസ് പ്രധാനമന്ത്രി ഷിൻസോ അബെ രാജിവെക്കുമെന്ന് ദേശീയ മാധ്യമമായ എൻഎച്ച്കെയുടെ റിപ്പോർട്ട്. ആരോഗ്യ പ്രശ്നങ്ങൾ ചൂണ്ടിക്കാട്ടിയാണ് രാജിക്ക് ഒരുങ്ങുന്നത്. അബെയുടെ ആരോഗ്യ നിലയെ കുറിച്ചും ഭരണ കാലാവധിയെയും കുറിച്ചും നിരവിധി ഊഹാപോഹങ്ങൾ ഉയർന്നിരുന്നു. വർഷങ്ങളായി അൾസറിന് ചികിത്സയിലാണ് ആബെ. ഉപപ്രധാനമന്ത്രി അസോയെ താൽക്കാലിക നേതാവായി തിരഞ്ഞെടുത്തേക്കും. ഒരേസമയം ഉപപ്രധാനമന്ത്രിയും ധനമന്ത്രിയുമായ അസോ അബെയുടെ മന്ത്രിസഭയിലെ പ്രമുഖനാണ്. 2008ൽ അസോ എൽഡിപി നേതാവായി തിരഞ്ഞെടുക്കപ്പെട്ടിരുന്നു.
പ്രതിരോധമന്ത്രി ടാരോ കൊനോ, രാഷ്ട്രീയക്കാരനും വിശ്വസ്തനായ ലെഫ്റ്റനന്റുമായ യോഷിഹൈഡ് സുഗ, പരിസ്ഥിതി മന്ത്രിയും മുൻ പ്രധാനമന്ത്രി ജുനിചിരോ കൊയിസുമിയുടെ മകനുമായ ഷിൻജിറോ കൊയിസുമി, ആരോഗ്യമന്ത്രി കട്സുനോബു കറ്റോ, സാമ്പത്തിക മന്ത്രി യസുതോഷി നിഷിമുര, സീകോ നോഡ എന്നിവരും അബെക്ക് പിൻഗാമികളാകാൻ സാധ്യതയുണ്ട്.