ദിനേഷ് കാർത്തിക് കൊൽക്കത്ത നൈറ്റ് റൈഡർസിന്റെ ക്യാപ്റ്റൻ സ്ഥാനം ഒഴിഞ്ഞു. തുടർന്നുള്ള മത്സരങ്ങളിൽ വൈസ് ക്യാപ്റ്റനായ ഇയൻ മോർഗൻ കൊൽക്കത്തയെ നയിക്കും. ടീം മാനേജ്മെന്റ് നൽകിയ ഔദ്യോഗിക വാർത്താകുറിപ്പിലാണ് ഇക്കാര്യം അറിയിച്ചത്.
ബാറ്റിംഗിൽ ശ്രദ്ധ കേന്ദ്രീകരിക്കുന്നതിനായാണ് ദിനേശ് കാർത്തിക്ക് സ്ഥാനം ഒഴിഞ്ഞത്. ലീഗിൽ നാലാംസ്ഥാനത്താണ് കൊൽക്കൊത്ത. ഏഴ് മത്സരങ്ങളിൽ ദിനേശ് കാർത്തിക്കിന്റെ ബാറ്റിംഗ് പ്രകടനം മെച്ചപ്പട്ടതായിരുന്നില്ല. കാർത്തിക്കിന്റെ ബാറ്റിംഗ് രീതിയെക്കുറിച്ചും ലൈൻ അപ്പ് തെരഞ്ഞെടുപ്പിനെക്കുറിച്ചും ഏറെ വിമർശനങ്ങൾ ഉയർന്നിരുന്നു. അദ്ദേഹത്തിന്റെ തീരുമാനങ്ങളാണ് പലപ്പോഴും ടീമിനെ തോൽവിയിലേക്ക് നയിച്ചതെന്നും സമൂഹ മാധ്യമങ്ങളിൽ പ്രചരിച്ചിരുന്നു.2018ൽ ഗൗതം ഗംഭീറിന് പകരമായാണ് ദിനേഷ് കാർത്തിക് ക്യാപ്റ്റൻ സ്ഥാനം ഏറ്റെടുത്തത്.
ദിനേശ് കാർത്തിക്കിന്റെ ആവശ്യം അംഗീകരിക്കുന്നതായി ടീം സിഇഒ വെങ്കി മൈസൂർ പറഞ്ഞു. തീരുമാനം തങ്ങളെ ഞെട്ടിച്ചുവെന്നും അദ്ദേഹം കൂട്ടിച്ചേർത്തു.
