നിങ്ങളുടെ ഡെബിറ്റ്/ ക്രെഡിറ്റ് കാർഡ് ഉപയോഗിച്ചുളള ഓൺലൈൻ ഇടപാടുകൾ ബ്ലോക്ക് ചെയ്യപ്പെട്ടേക്കാം. ഇതുവരെ ഓൺലൈൻ ഇടപാടുകൾ നടത്താത്ത ഡെബിറ്റ്/ ക്രഡിറ്റ് കാർഡുകളാണ് ബ്ലോക്ക് ഭീഷണിയുടെ നിഴലിലുള്ളത്. മാർച്ച് 16 നകം ഓൺലൈൻ ഇടപാടുകൾ നടത്താത്തവരുടെ കാർഡുകളാകും ബ്ലോക്ക് ചെയ്യപ്പെടുക. റിസർവ് ബാങ്കാണ് ഇത് സംബന്ധിച്ച് നിർദ്ദേശം പുറത്തിറിക്കിയത്. മാർച്ച് 16 ശേഷം ഈ കാർഡുകൾ ഉപയോഗിച്ച് ഓൺലൈൻ ഇടപാടുകൾ നടത്താനാവില്ല. ഇടപാടുകളുടെ സുരക്ഷ ഉറപ്പാക്കുന്നതിന്റെ ഭാഗമായാണ് റിസർവ് ബാങ്കിന്റെ നടപടി. കാർഡുകൾ അനുവദിക്കുന്ന കമ്പനികൾക്കും ബാങ്കുകൾക്കും റിസർവ് ബാങ്ക് നിർദേശം നൽകി.
ഇതുവരെ ഓൺലൈൻ ഇടപാടുകൾ നടത്താത്ത ഉപഭോക്താക്കളുടെ ഡെബിറ്റ്, ക്രെഡിറ്റ് കാർഡുകളുടെ തുടർന്നുളള ഓൺലൈൻ സേവനം അവസാനിപ്പിക്കാനാണ് നിർദേശത്തിൽ പറയുന്നത്. ഓൺലൈൻ ഇടപാട് നടത്താത്ത കാർഡുകളിൽ ഓൺലൈൻ സേവനം ലഭിക്കണമെങ്കിൽ ബാങ്കിൽ പ്രത്യേകമായി അപേക്ഷ നൽകേണ്ടി വരും.
പുതിയ ഡെബിറ്റ്, ക്രെഡിറ്റ് കാർഡുകൾ അനുവദിക്കുമ്പോൾ, രാജ്യത്തിനകത്തെ എടിഎമ്മുകൾ, പിഒഎസ് ഇടപാടുകൾക്ക് മാത്രമാണ് ഉപയോഗിക്കുന്നതെന്ന് ബാങ്കുകൾ ഉറപ്പാക്കും. കാർഡ് ഉപയോഗിച്ച് ഓൺലൈൻ ഇടപാടുകളോ അന്താരാഷ്ട്ര ഇടപാടുകളോ നടത്താൻ ആഗ്രഹിക്കുന്നവർ പ്രത്യേകമായി ബാങ്കിന് അപേക്ഷ നൽകണം.
